धनगढी क्रिकेट एकेडेमी र सगरमाथा सिमेन्टबीच प्रायोजन सम्झौता

काठमाडौं : धनगढी प्रिमियर लिगको आयोजक धनगढी क्रिकेट एकेडेमी र सगरमाथा सिमेन्टबीच प्रायोजन सम्बन्धि सम्झौता भएको छ । धनगढी क्रिकेट एकेडेमीको स्तरोन्नती तथा ग्रासरुट क्रिकेटको विकासमा सहकार्यका लागि दुई पक्षबीच सम्झौता भएको बुधबार जारी गरिएको प्रेस विज्ञप्तिमा जानकारी दिइएको छ । प्रायोजन सम्झौता तीन वर्षका लागि हुने विज्ञप्तिमा उल्लेख छ ।

सम्झौता अनुसार सगरमाथा सिमेन्टले तीनवर्षका लागि धनगढी क्रिकेट एकेडेमीलाई आवश्यक पर्ने खेल सामाग्री प्रदान गर्नेछ । त्यस्तै, धनगढी क्रिकेट एकेडेमीले अयोजना गर्ने प्रतियोगिताका र ग्रास रुट कार्यक्रमका लागि पनि सगरामाथा सिमेन्टले सहयोग गर्नेछ । यसअघि पनि सगरमाथा सिमेन्टले एकेडेमीलाई धनगढी प्रिमियर लिग आयोजना गर्न सहयोग गर्दै आएको थियो ।

प्रायोजन सम्झौता अनुरुप, धनगढी क्रिकेट एकेडेमीले प्रयोग गर्ने जर्सी, आयोजना गर्ने प्रतियोगितामा सिमेन्टको लोगो प्रयोग गरिनेछ । प्रायोजनको आर्थिक पक्षका बारेमा भने विज्ञप्तिमा खुलाइएको छैन । सम्झौता पत्रमा सगरामथा सिमेन्टको उत्पादक कम्पनी घोराही सिमेन्ट इन्डिष्ट्रिजका मार्केटिङ प्रमुख प्रतिक अधिकारी र एकेडेमीका अध्यक्ष सुवास शाहीले हस्ताक्षर गरे ।

एकेडेमीका अध्यक्ष शाहीले सगरमाथा सिमेन्टसँगको सहकार्यले सुदुरपश्चिममा क्रिकेट खेलाडीको उत्पादनमा टेवा पुग्ने विश्वास गरे । ‘सगरमाथा सिमेन्टसँगको सहकार्यले क्रिकेटरहरुको उत्पादनमा सहयो पुग्ने विश्वास लिएका छौं । हामीलाई उहाँहरुले निर्माण हुन लागेको फाप्ला क्रिकेट मैदानका लागि पजि सहयोग गर्ने वाचा गर्नुभएको छ । त्यसले हामीलाई उत्साहित बनाएको छ,’ शाहीले भने ।

उता घोराही सिमेन्टका मार्केटिङ प्रमुख अधिकारीले धनगढी क्रिकेट एकेडेमीको माध्यमकाट नेपली क्रिकेट विकासमा योगदान गर्न पाउँदा खुशी लागेको बताए । ‘विगतमा पनि हामीले धनगढी क्रिकेट लिग हुँदै धनगढी प्रिमियर लिगलाई पनि मुख्य प्रायोजन गरिसकेका छौं । पुनः एकपटक धनगढी क्रिकेट एकेडेमीसँग सहकार्य गर्न पाउँदा हामी खुशी छौं,’ अधिकारीले भने ।