वडा स्तरीय विरोध प्रदर्शनमा सहभागिता जनाउन कांग्रेसको अपिल

काठमाडौँ : प्रमुख प्रतिपक्षी दल नेपाली कांग्रेसले प्रतिनिधि सभा विघटनविरुद्ध बिहीबार मुलुकभरका ६७४३ वडाहरूमा गर्न लागेको विरोध प्रदर्शनमा सहभागी सबैलाई आग्रह गरेको छ । सभापति शेरबहादुर देउवाले बुधबार वडा स्तरीय प्रदर्शनमा ८ गते सहभागी भएर,संसद विघटनविरुद्ध ऐक्यवद्धता प्रकट गर्न सबैमा अपिल गरेका हुन् । 

‘के.पी. शर्मा ओलीको नेतृत्वमा रहेकोे नेपाल कम्युनिष्ट पार्टीको सरकारको सिफारिसमा भएको प्रतिनिधिसभा विघटनको घटनाविरुद्ध नेपाली कांग्रेसले भोलि माघ ८ गते बिहीवार ६,७४३ वडाहरूमा आयोजना गरेको विरोध प्रदर्शनमा सहभागी हुन सबैमा हार्दिक अपिल गर्दछु,’ देउवाले अपिलमा भनेका छन् ।

कांग्रेसले प्रतिनिधि सभा विघटनलाई असंवैधानिक र अलोकतान्त्रिक भएको निर्णय गरेर आन्दोलनको कार्यक्रम घोषणा गरेको थियो । बिहीबार वडास्तरमा हुन लागेको आन्दोलन कांग्रेसको दोस्रो चरणको अन्तिम आन्दोलन हो । 

यसअघि विघटनविरुद्धमा पहिलो चरणमा कांग्रेसले पुस १३ गते १६५ निर्वाचन क्षेत्रमा विरोध प्रदर्शन गरेको थियो । दोस्रो चरणमा यसअघि  पुस २५ गते ३३० प्रदेशसभा निर्वाचन क्षेत्रमा तथा माघ ३ गते ७५३ पालिकाहरुमा विरोध प्रदर्शन गरिसकेको छ । 

देउवाले संविधानमा भएको व्यवस्था प्रतिकुल, जनभावनाविपरीतको कार्यविरुद्ध नेपाली कांग्रेस एकमत भएको समेत अपिलमा उल्लेख गरेका छन् ।