प्रतिनिधि सभा विघटनविरुद्ध ललितपुरमा जसपाको प्रदर्शन

काठमाडौँ : प्रतिनिधि सभा विघटनिवरुद्ध जनता समाजवादी पार्टीले मुलुकभर विरोध प्रदर्शन गरेको छ । दोस्रो चरणको अन्तिम कार्यक्रमस्वरुप आज मुलुकभर विरोध कार्यक्रम गरिएको हो । यसअन्तर्गत ललितपुरमा पनि विरोध प्रदर्शन गरियो । प्रदर्शनमा बोल्ने वक्ताहरूले प्रधानमन्त्री केपी शर्मा ओलीले जनताको सार्वभौम अधिकार हनन गरेकाले राजा बनेर त्यसको लागि जनतासँग माफी माग्‍नु पर्ने बताए । 

प्रदर्शनपछिको सभालाई प्रमुख वक्ताका रूपमा सम्बोधन गर्दै केन्द्रीय कार्यसमिति सदस्य केशव झाले प्रधानमन्त्रीको प्रतिनिधि सभा विघटन गर्ने कार्य संविधानविपरीत भएको बताए । उनले सर्वोच्च अदालतले संविधानको मर्म र भावना अनुसार नै फैसला गर्ने विश्वास आफूहरूमा रहेको बताए ।

ओलीले चुनाव गर्ने मनसायले प्रतिनिधि सभा विघटन नगरेको झाले बताए । 'संविधान नै नमान्‍नेले चुनाव के गर्ला ? फेरि जनताले त ५ वर्षको मतादेश दिएको होइन र अनि ३ वर्षमै किन चाहियो चुनाव,' झाले भने । उनले निर्वाचन आयोगलाई ओलीको स्वार्थ पूरा गर्न घोषणा गरिएको निर्वाचनको तयारी थालेर राज्यको धुकुटी रित्याउनतर्फ नलाग्‍न सुझाए ।