भिल्लालाई हराउँदै सिटी दोस्रो स्थानमा

काठमाडौं : इंग्लिस प्रिमियर लिग फुटबलमा म्यानचेष्टर सिटी दोस्रो स्थानमा उक्लिएको छ । बुधबार राती भएको खेलमा एस्टन भिल्लालाई २-० गोल अन्तरले हराउँदै सिटी दोस्रो स्थानमा उक्लिएको हो ।

सिजनका शुरुवाती खेलमा लगातार खराब प्रदर्शन गरेको सिटी पछिल्लो समय भने लयमा देखिएको छ । संघर्षपूर्ण खेलमा सिटीले खेलको अन्त्यतिर विजयी गोल गरेको थियो । उसका लागि खेलको ७९ औँ मिनेटमा बर्नान्डो सिल्भाले गोल गर्दै टिमलाई अग्रता दिलाए ।

खेलको ९० औँ मिनेटमा इकी गुन्डोगानले पेनाल्टीमा गोल गर्दै सिटीको जित सुनिश्चित गरेका हुन् । जितपछि सिटी १८ खेलबाट ३८ अंकसहित प्रिमियर लिगको दोस्रो स्थानमा उक्लिएको हो । शीर्ष स्थानको म्यान्चेष्टर युनाईटेड र तेस्रो स्थानको लेस्टरभन्दा एक खेल कम खेलेको सिटी शीर्ष स्थानमा पुग्ने सम्भावना पनि छ ।

भिल्ला भने १६ खेलबाट २६ अंकसहित लिगको ११ औँ स्थानमा छ । (अन्तराष्ट्रिय सञ्चारमाध्यमको सहयोगमा)