किशोरी हत्या अभियोगमा मन्सुरी पक्राउ

रौतहट : रौतहट, दुर्गा भगवती गाउँपालिका–४ छतौना टोल बस्ने १७ वर्षीया रोबिना मन्सुरीको हत्या भएको छ । हत्याको अभियोगमा सोही ठाउँ बस्ने ३३ वर्षीय फुल महम्मदलाई बुधबार राति प्रहरीले पक्राउ गरेको छ ।

१९ वर्षीय युवकसँग रोबिनाको प्रेम सम्बन्धको विषयलाई लिएर हत्या भएको प्रहरीले बताएको छ । महम्मद समेत ४ जनाले रोबिनाको हत्या गरी सोही ठाउँ बस्ने जनरल कवाडीको घरमा शव राखेको भन्ने खबर प्रहरीलाई प्राप्त भएको हो ।

जिल्ला प्रहरी कार्यालय रौतहट र ईलाका प्रहरी कार्यालय गंगापिपराबाट खटिएको प्रहरीले महम्मदलाई पक्राउ गरेको हो । उक्त घटनामा संलग्न रही फरार रहेका सोही ठाउँ बस्ने ४३ वर्षीय लाल महम्मद, ५० वर्षीय नसरुदिन मन्सुरी र उनकी श्रीमती ४३ वर्षीया सहनाज मन्सुरी हाल फरार छन् । उनीहरुलाई प्रहरीले खोजी गरिरहेको छ ।