फुटबलका सर्वाधिक गोलकर्ता बने रोनाल्डो

काठमाडौं : क्रिष्टियानो रोनाल्डो फुटबल इतिहासमै सर्वाधिक गोल गर्ने खेलाडी बनेका छन् । युभेन्टसका लागि नापोलीलाई हराउँदै इटालियन सुपर कपको उपाधि जित्दा एक गोल गरेका रोनाल्डो फुटबल इतिहासमै सर्वाधिक ७ सय ६० गोल गर्ने खेलाडीको किर्तिमान आफ्नो नाममा लेखाउन सफल भएका हुन् ।

यसअघि यो किर्तिमान पेले र जोसेफ बिचानको नाममा थियो । बिचान र पेलेलाई उछिन्दै रोनाल्डोले सर्वाधिक ७६० गोल गरेका हुन् । बिचानले ७ सय ५९ गोल गरेको किर्तिमान छ । यस्तै पेलेले ७ सय ५७ गोल गरेको किर्तिमान मानिन्छ । तर सर्वाधिक गोलको किर्तिमान भने विवादमै छ । 

रोनाल्डोले लिस्बोनका लागि ५, म्यानचेस्टर युनाइटेडका लागि ११८, रियल मड्रिडका लागि ४५०, युभेन्टसका लागि ८५ र आफ्नो देश पोर्चुगलका लागि १०२ गोल गरेका छन् । रोनाल्डो रियलका सर्वाधिक गोलकर्ता समेत हुन् । (अन्तराष्ट्रिय सञ्चारमाध्यमको सहयोगमा)