जिदान तत्काल बर्खास्त नहुने

काठमाडौँ :‘कोपा डेल रे’ मा स्पेनी तेस्रो श्रेणीको अल्कोयानोसँग रियल म्याड्रिडले अप्रत्याशित पराजय भोगेपछि दबाबमा रहेका जिनेदिन जिदान तत्कालका लागि बर्खास्तीमा नपर्ने बताइएको छ । अन्तराष्ट्रिय सञ्चार माध्यम गोल डट कमले रियलले आफ्‍ना प्रशिक्षक हटाउने बारेमा नसोचेको दाबी गरेको छ ।

बुधबार १० खेलाडीमा सिमित रहेको अल्कोयानोबाट हार ब्यहोरेपछि जिदान बर्खास्तीमा पर्न सक्ने अनुमान भइरहेको बेला गोल डट कमले फ्रेन्च प्रशिक्षक रियलमै रहने लेखेको छ । स्पेनी लिगामा दोस्रो स्थानमा रहेको रियल घरेलु कपबाट बाहिरिएपछि जारी सिजनमा उपाधिबाट विमुख हुने सम्भावना बढेको छ । त्यसकारण जिदान दबाबमा छन् । तर दबाबमा रहे पनि जिदानले विगतमा हासिल गरेका सफलताका कारण उनी सजिलै क्लबबाट बर्खास्तीमा नपर्ने गोलडटकमको रिपोर्टमा उल्लेख छ ।

लिगमा शीर्षस्थानमा रहेको एथलेटिको म्याड्रिडको भन्दा दुई खेल कम खेले पनि रियल सहरी प्रतिद्वन्द्वी भन्दा चार अंकले पछाडि छ । च्याम्पियन्स लिगमा समेत खासै राम्रो प्रदर्शन गर्न नसकेको रियलले प्रशिक्षक परिवर्तन गर्नुपर्ने माग उठिरहेको छ ।

दुई ला लिगा र तीन च्याम्पियन्स लिग जिताएका जिदानलाई बर्खास्त गर्ने भन्दा पनि उनलाई समय दिने मनस्थितीमा फ्लोरेन्टिनो पेरेज रहेको बताइएको छ । त्यसो त जिदान आफैले पनि टिमको प्रदर्शनमा सुधार नआए थप दबाब भोग्‍नुपर्ने तथ्यसँग सहमत छन् । कमजोर विपक्षी अल्कोयानोसँग पराजय भोगेपछि पत्रकारहरुसँग कुरा गर्दै जिदानले हारको जिम्मेवार आफुले लिने बताएका थिए ।

एक महिना अघि च्याम्पियन्स लिगमा शाख्तर डोनेस्कसँग पराजित भएपछि दबाब झेलेका जिदानले त्यसपछिका खेलहरुमा जित दिलाउँदै आफ्नो कुर्सी बचाएका थिए । शाख्तरसँग हार ब्यहोरेपछि लगातार ६ खेलमा जित निकालेको रियलले च्याम्पियन्स लिगको अन्तिम १६ मा स्थान पक्का गर्दै लिग तालिकामा समेत सुधार गरेको थियो । शुक्रबार लिगमा अलाभेसको सामना गर्दा जिदानले पुनः एक पटक रियलको लय सुधार गर्ने मौका पाउनेछन् ।