बारमा चार पूर्वअध्यक्षले संयुक्त विज्ञप्ति जारी गर्दै भने : राजतन्त्रमासमेत सत्तापक्षद्वारा यसप्रकारको निर्लज्ज प्रहार भएको थिएन

काठमाडौँ : नेपाल बार एसोसिएसनका ४ पूर्वअध्यक्षहरूले प्रधानमन्त्री केपी शर्मा ओलीले माघ ९ गते आफ्नो दलका पेसा व्यवसायीहरूको भेलामा अभिव्यक्त गरेको विचारप्रति आपत्ति जनाएका छन् ।

बारका पूर्वअध्यक्षहरू हरिहर दहाल, शम्भु थापा, प्रेमबहादुर खड्का र शेरबहादुर केसीले आइतबार संयुक्त प्रेस विज्ञप्ति जारी गर्दै कानुन व्यवसायीका सबभन्दा जेष्ठ सदस्य वरिष्ठतम अधिवक्ता बारका पूर्वअध्यक्ष कृष्णप्रसाद भण्डारीको घोर अपमान र मानमर्दन गरेका उल्लेख गरेका छन् । 

उनीहरूको विज्ञप्तिमा भनिएको छ, ‘यो समस्त कानुन व्यवसायमाथि कै सत्तापक्षद्वारा गरिएको निर्लज्ज प्रहार हो भन्ने हाम्रो निश्कर्ष रहेको छ ।’

प्रधानमन्त्री ओलीले ‘एक जना बाजे वकिललाई पनि लिएर गएछन बहस गर्न, के तमासा गरेको हो यौ ? वकिलले कुरा फिट्या फिट्यै छन् ढुक्क हुनुहोस प्रतिनिधि सभा पुनस्र्थापना हुँदैन्’ भन्‍ने अभिव्यक्ति दिएका थिए । 

पूर्वअध्यक्षहरूले मुलुकको कार्यकारी प्रमुखका यस्ता अभिव्यक्ति कानुन व्यवसायीमाथिको प्रहार भएको बताएका छन् । ‘प्र.म का अभिव्यक्तिले संविधानद्वारा संरक्षित कानुन व्यवसायमाथि नै धावा बोलिएकोले लोकतन्त्रका पहरेदार कानुन व्यवसायीमाथिको यो प्रहारलाई मुक दर्शक भएर सहन गर्न नसकिने भएकोले यो विज्ञप्ती प्रकाशित गरिएको छ,’ संयुक्त विज्ञप्तिमा भनिएको छ ।

उनीहरूले कानुन व्यवसायमाथि राजतन्त्रमा पनि यस्तो प्रहार नभएको विज्ञप्तिमा उल्लेख गरेका छन् । ‘२०१३ साल देखि संस्थागत स्वरूप ग्रहण गरेको कानुन व्यवसायलाई तमासा देखाएको भनि राजतन्त्रकालमासमेत सत्तापक्षद्वारा यस प्रकारको निर्लज्ज प्रहार भएको थिएन,’ ।