पुल उद्घाटन गर्न प्रधानमन्त्री ओली दाङ जाँदै

काठमाडौं : पुल उद्घाटन गर्न प्रधानमन्त्री केपी शर्मा ओली आज दाङ जाँदैछन् । दाङ देउखुरीको राप्ती नदीमा बनेको पुल उदघाटन गर्न प्रधानमन्त्री ओली दाङ जान लागेका हुन् । 

राप्ती गाउँपालिकाको सिसहनिया र गढवा गाउँपालिकाको महदेवा जोड्ने राप्ती नदीको पुलको शिलान्यास तत्कालीन प्रधानमन्त्री पुष्पकमल दाहाल ‘प्रचण्ड’ले २०७३ मंसिर २२ गते शिलान्यास गरेका थिए । करिब एक अर्ब लागतमा चार वर्षभित्र निर्माण सम्पन्न गर्ने लक्ष्य भए पनि निर्धारित समय अगावै पुल निर्माण सम्पन्न भएको थियो ।

८६० मिटर लम्बाइ र साढे १० मिटर चौडाइको यो पुल नेपालकै दोस्रो लामो हो । सबैभन्दा लामो पुल भने बर्दियाको कोठियाघाटस्थित कर्णाली नदीमा छ । जसको लम्बाइ १ हजार १५ मिटर छ ।

प्रधानमन्त्री ओलीले राप्ती पुलको उदघाटन गरेपछि राप्ती गाउँपालिकाको लालमटियामा आयोजना गरिएको कार्यकर्ता भेलालाई सम्बोधन गर्ने कार्यक्रम पनि छ । भेलालाई मुख्यमन्त्री शंकर पोखरेलले पनि सम्बोधन गर्नेछन् ।

मुख्यमन्त्री र प्रधानमन्त्रीले सम्बोधन गर्ने भएकाले ब्यानरमा ओलीसँगै मुख्यमन्त्री पोखरेलको पनि फोटो राखिएको छ ।