नेकपाको विवादले दल दर्ता सम्बन्धि सूचना प्रकाशित गर्न केही दिन लाग्‍ने

काठमाडौँ : दल दर्ता सम्बन्धि सूचना प्रकाशित गर्न निर्वाचन आयोगलाई अझै केही दिन लाग्‍ने भएको छ । सत्तारुढ नेकपा विवाद टुंग्याउन नसकेपछि आयोगले थप परामर्श गर्नुपर्ने भएकाले दल दर्ता सम्बन्धि सूचना प्रकाशित गर्न केही दिन लाग्‍ने जनाएको हो ।

दल दर्ता सम्बन्धिको सूचना राजपत्रमा प्रकाशित गर्नुपर्ने व्यवस्था छ । तर नेकपाका दुई पक्षसँग एकसाथ छलफल गर्न ढिलाई भएपछि दल दर्ता सम्बन्धिको सूचना प्रकाशित गर्न केही दिन पर सार्नु परेको आयोगका एक पदाधिकारीले इकागजसँग बताए ।

सूचना प्रकाशित गर्नुअघि आयोगले नेकपाको ओली र दाहाल-नेपाल दुवै समूहसँग छलफल गर्ने तयारी गरेको छ । यसअघि आयोगले दुवै पक्षका शीर्ष नेतालाई छलफलमा बोलाएपनि दाहाल-नेपाल उपत्यकामा नभएका कारण छलफल भएको थिएन ।

आयोगका पदाधिकारीले दाहाल-नेपाल निकट कानुन व्यवसायीसँग पनि छलफल गरिरहेका छन् । दल दर्ता सम्बन्धि विवाद टुंग्याउनका लागि आयोगका पदाधिकारीले दुवै पक्ष निकट कानुन व्यवसायीसँग अनौपचारिक परामर्श गरिरहेका हुन् । 

संविधानको धारा २७२ मा राजनीतिक दलको गठन, दर्ता, सञ्चालन र सुविधा तथा तत्सम्बन्धी अन्य विषय संघीय कानून बमोजिम हुने उल्लेख छ । संघीय कानुनअनुसार विभाजित नेकपामध्ये कुनलाई आधिकारिकता दिने वा के गर्ने भन्ने विषयमा आयोगकै पदाधिकारीले कानुन व्यवसायीसँग परामर्श गर्न लागेका हुन् । 

कानुन व्यवसायीको राय र सुझावपछि आयोगले दुवै पक्षलाई बोलाएर एकपटक छलफल गरेपछि दल दर्ता सम्बन्धि सूचना प्रकाशित गर्नेछ । सरकारले घोषणा गरेको बैशाख १७ र २७ गते चुनाव सम्पन्‍न गर्नका लागि एक हप्ताभित्र दल दर्तासम्बन्धि सूचना प्रकाशित गरिसक्नुपर्ने हुन्छ ।

यस्तै आयोगले दर्ता सम्बन्धिको विधि र प्रक्रियाका विषयमा सोमबार पूर्व प्रमुख निर्वाचन आयुक्तसँग पनि छलफल गर्दैछ ।