भारतीय सडक विस्तारले महाकाली नदी थुनियो

फाइल तस्बिर

काठमाडौँ  : दार्चुलाको माल्पामा महाकाली नदी थुनिएको छ । भारतीय क्षेत्रमा सडक खन्दा बाहिर फालिएका ढुंगा माटोले महाकाली नदी थुनिएको दार्चुलाका प्रमुख जिल्ला अधिकारी शरदकुमार पोखरेलले इकागजलाई जानकारी दिए ।  

'महाकाली नदी माथि भारतले सडक खनिरहेकाे छ । नदीकाे माथिल्लाे क्षेत्र साँघुराे पनि छ । त्यहाँ ढु‌गामुडा, गेग्रान खसेर थुनिएकाे हाे' प्रजिअ  पाेखरेलले भने, 'भारतीय पक्षले खुलाउने प्रयास गरिरहेको भन्ने जानकारी पनि आएको छ ।' सडक निर्माण गर्दा थुप्रिएका ढुंगा,माटो महाकाली नदीमा पहिरिएको हो ।  नदी थुनिएपछि जिल्ला प्रशासन कार्यालयले तटिय क्षेत्रका स्थानीयलाई सतर्क आग्रह गरेको छ ।  

‘माल्पा भन्ने ठाउँमा ठूलो पहिरोको कारण महाकाली नदी थुनिन गएकोले कुनै पनि बेला नदीमा जम्मा भएको पानी फुट्न सक्ने सम्भावना रहेको भन्ने जानकारी हुन आएकोले महाकाली नदी नजिक बस्ती भएका र सो क्षेत्रमा काम गर्ने सबैलाई सचेत रही आवश्यक सतर्कता अपनाउन सम्बन्धित सबैको जानकारीको लागि यो सूचना प्रकाशित गरिएको व्यहोरा अनुरोध छ’ जिल्ला प्रशासन कार्यालयले जारी गरेको पत्रमा भनिएको छ ।