देहरादुनमा कुटिएका विद्यार्थीको अविलम्ब उद्दार गर्न कांग्रेसको आग्रह

काठमाडौं : प्रमुख प्रतिपक्षी दल नेपाली कांग्रेसले देहरादुनमा नेपाली विद्यार्थी कुटिएको घटनालाई गम्भीरतापूर्वक लिन र पीडित विद्यार्थीको अविलम्ब उद्दार गर्न सरकारलाई आग्रह गरेको छ । 

कांग्रेस प्रवक्ता विश्‍‍वप्रकाश शर्माले बिहीबार विज्ञप्ति जारी गरी हिन्दु धर्मालम्वीहरुको महान चाड विजयादशमीको दिन देहरादुनमा नेपाली विद्यार्थीहरूमाथि भएको कुटपिटबारे भारत सरकारको ध्यानाकर्षण गराउन र उनीहरूको अविलम्ब रिहाइ गर्न माग गरेका हुन् । ‘देहरादुनमा विजया दशमीकै दिन दर्जनौँ नेपाली विद्यार्थीहरु माथि भएको कुटपिटको घटनालाई गम्भीरतापूर्वक लिन, विरोध प्रकट गर्दै भारत सरकारको ध्यानाकर्षण गराउन र ती विद्यार्थीहरुको अविलम्ब उद्दार गर्न नेपाली कांग्रेस नेपाल सरकारसमक्ष माग गर्दछ,’ शर्माद्वारा जारी विज्ञप्तिमा भनिएको छ । 

नेपाल र भारत दुबै देशका विद्यार्थी एकापसको देशका विभिन्न शहरमा अध्यनरत रहेकाले जो जहाँ पढिरहेका छन् सुरक्षीत र निर्भीक वातावरण प्राप्त गर्नु तिनको अधिकार मात्रै होइन त्यसको सुनिश्चितता गर्ने अभिभारा दुवै देशका सरकारहरूको भएको कांग्रेसले बताएको छ । 

कुनै पनि बहानामा संसारमा कहिँ पनि कोहि एकमात्र पनि नेपाली विद्यार्थी या अन्य कोहि पनि नेपाली नागरिक दुव्र्यवहार र आक्रमणमा पर्छन् भने त्यसलाई नेपाल सरकारले गम्भीरतापूर्वक लिनुपर्ने शर्माले विज्ञप्तिमा उल्लेख गरेका छन् । 

विज्ञप्तिमा नेपाली विद्यार्थीहरुको सुरक्षा र सम्मानबारे गम्भीर पहलकदमी गरेर आगामी दिनमा यस्ता घटना दोहो¥याउन नदिन आवश्यक सतर्कता अपनाउन सरकारलाई आग्रह गरिएको छ ।