बोनस सेयर घोषणा लगत्तै स्वाभिमानको सेयरमा सर्किट

काठमाडौं : बोनस सेयर घोषणा गरेलगत्तै स्वाभिमान लघुवित्त वित्तीय संस्थाको सेयर मुल्‍यमा सकारात्मक सर्किट लागेको छ । मंगलबार बसेको सञ्‍चालक समितिले २० प्रतिशत बोनस सेयर प्रस्ताव गर्ने निर्णय गरेकव थियो । बुधबार यो निर्णय सार्वजनिक भएलगत्तै स्वाभिमान लघुवित्तको सेयर १० प्रतिशतले बढेर रोकिएको हो ।

पछिल्लो समय वित्तीय संघसंस्थाहरूले आकर्षक बोनस लाभांश घोषणा गरेपछि सेयर बजारमा लगानीकर्ताको ओइरो लागेको छ । विगतमा बढी मात्रा नगद लाभांश बाँड्ने गरेकाले बुक क्लोजलगत्तै सेयर बेचेर लगानीकर्ता बाहिरिने गरेका थिए । तर यसपाली नगद लाभांशभन्दा बोनस सेयरमा बढी केन्द्रीत भएकाले पुँजीगत लाभ लिन लगानीकर्ताहरूको आकर्षण बढेको छ ।

फागुन १३ गते बस्‍ने चौंथो साधारणसभाले बोनस पारित गर्नेछ । आर्थिक वर्ष २०७६/७७ सम्‍मको कुल सञ्‍चित वितरणयोग्‍य मुनाफाबाट संस्‍थाको चुक्ता पुँजीको २० प्रतिशत जारी गर्ने संस्थाले जानकारी दिएको छ । जसअनुसार बोनस सेयर १ करोड ५३ लाख ४२ हजार ३ सउ ६० रुपैयाँ हुन्‍छ ।

त्‍यसबाहेक ८ लाख ७ हजार चार सय ९२ रुपैयाँ नगद लाभांश बाँड्ने प्रस्तावमा उल्‍लेख छ । यो चुक्ता पुँजीको १.०५ प्रतिशत हो ।