२५०० अंक पार गरेर फर्कियो सेयर बजार

काठमाडौं : मंगलबारको उछालपछि सेयर बजारमा सामान्य करेक्सन आएको छ । ६ दशमलव ८१ अंकले घटेको नेप्से परिसुचक २४६६ दशमलव ९२ बिन्दूमा पुगेको हो ।

मंगलबार ६५ दशमलव ४९ अंकले बढेको नेप्से २४७३ दशमलव ७३ बिन्दु पुगेको थियो । बुधबारको कारोबारमा बैंकिङ समूह, हाइड्रोपावर, माइक्रोफाइनान्स र म्युचुअल फन्डबाहेक सबै परिसूचक रातम्मे भए ।

सबैभन्दा बढी ट्रेडिङ समूह, होटल, फाइनान्स, म्यानुफ्याक्चरिङ र जीवन बीमा समूहको परिसुचक ओरालो लागेको छ । ट्रेडिङ समूहको परिसुचक २ दशमलव २१ प्रतिशतले घटेको छ । फाइनान्समा १ दशमलव ६८ प्रतिशत र म्यानुफ्याक्चरिङमा १ दशमलव ६५ प्रतिशतले गिरावट आएको छ ।

प्री ओपन सेसनमा २५ सय अंक नाँघेको नेप्से क्रमश ओरालो लाग्यो । अन्तर दिवसीय कारोबारमा तिव्र उतार चढाव पार गर्दै अन्तिममा २४६६.२२ बिन्दूमा टुंगिएको थियो । सुरुको कारोबारमा हतारिएर लगानी गर्नेले ६१ अंकसम्मको घाटा बेहोर्नुपर्‍यो ।

बोनस सेयर घोषणा गरेलगत्तै स्वाभिमान लघुवित्त वित्तीय संस्थाको सेयर मुल्‍यमा सकारात्मक सर्किट लागेको छ । मंगलबार बसेको सञ्‍चालक समितिले २० प्रतिशत बोनस सेयर प्रस्ताव गर्ने निर्णय गरेकव थियो । बुधबार यो निर्णय सार्वजनिक भएलगत्तै स्वाभिमान लघुवित्तको सेयर १० प्रतिशतले बढेर रोकिएको हो ।

पछिल्लो समय वित्तीय संघसंस्थाहरूले आकर्षक बोनस लाभांश घोषणा गरेपछि सेयर बजारमा लगानीकर्ताको ओइरो लागेको छ । विगतमा बढी मात्रा नगद लाभांश बाँड्ने गरेकाले बुक क्लोजलगत्तै सेयर बेचेर लगानीकर्ता बाहिरिने गरेका थिए । तर यसपाली नगद लाभांशभन्दा बोनस सेयरमा बढी केन्द्रीत भएकाले पुँजीगत लाभ लिन लगानीकर्ताहरूको आकर्षण बढेको छ ।

कारोबार रकम साढे ९ अर्ब पुग्यो

सेयर बजार सुचकमा सामान्य करेक्सन आएपनि बुधबारको कारोबार भने ९ अर्ब ५३ करोड रुपैयाँ नाँघेको छ । ९१ हजार ५ सय ५९ पटकको कारोबारमा २ करोड २० लाख किट्टा सेयर किनबेच भएको छ ।

बुधबार सबैभन्दा बढी ग्लोबल आइएमइ बैंकको सेयर किनबेच भएको छ । ग्लोबल आइएमइ बैंकको सेयर किनबेच ५६ करोड १९ लाख रुपैयाँ हाराहारी पुगेको छ ।

त्यसबाहेक करिब ३२ करोड ७० लाख रुपैयाँ बराबर कारोबार भएको पुनर्बीमा कम्पनीको सेयर मुल्य प्रति कित्ता एक हजार ६ सय ६ रुपैयाँ पुगेको छ ।

यसरी कारोबारमा आएको ग्लोबल आइएमइको सेयर मुल्‍य पनि उच्च वृद्धि भएको छ । यसको मुल्य प्रति कित्ता चार सय रुपैयाँ छ ।

नेपाल टर्लिकम, शिखर इन्स्योरेन्स कम्पनी, नेपाल लाइफ इन्स्योरेन्स कम्पनी लगायतका कम्पनीको उच्च मात्रामा सेयर किनबेच भएको छ ।