पाँचखाल मेयर कपको उपाधि समाजकल्याणलाई

काभ्रे : ‘खुल्ला पाँचखाल प्रथम मेयर कप’को उपाधि समाजकल्याण युवा क्लबले हात पारेको छ  । बुधबार पाँचखाल युनाइटेड फुटबल एसाेसिएसन(पुफा)को मैदानमा सम्पन्‍न फाइनल खेलमा समाजकल्याणले लास्सोखोक धनलक्ष्मी युवा क्लबलाई ४–२ गोल अन्तरले पराजित गर्दै उपाधि हात पारेको हो । 

मेयर कपको उपाधि जितेको समाजकल्याणले नगद १ लाख रुपैयाँ प्राप्त गरेको छ भने उप–विजेता लास्सोखोकले ५० हजार हात पारेको छ । विजयी टिम तथा खेलाडीलाई पाँचखाल नगरपालिका प्रमुख महेश खरेलले पुरस्कार वितरण गरे । पुरस्कार वितरणपछि नगरप्रमुख खरेलले खेल जीवन र जीवन नै खेल भएको बताए । 

माघ ३ गतेदेखि २१ गतेसम्म सञ्‍चालन भएको खेलमा काठमाण्डौका ३, सिन्धुपाल्चोकका २, सिन्धुली र उदयपुरको १/१ तथा काभ्रेका १७ वटागरी २४ टिमले सहभागिता जनाएको आयोजक पाँचखाल युनाईटेड फुटबल एशोसिएसन(पुफा)का अध्यक्ष मिलन श्रेष्ठले जानकारी दिए । पुफा र  पाँचखाल नगरपालिकाको आयोजना प्रतियोगिता सञ्‍चालन भएको थियो ।