पैसा लिएर सीमा वारपार गराउने भारतीय पक्राउ

बुटवल : पैसा लिएर नेपाल भारत सीमा क्षेत्रबाट अवैध रुपमा मानिस भित्र्याउने एक भारतीयलाई प्रहरीले पक्राउ गरेको छ । जिल्ला प्रहरी कार्यालय रुपन्देहीले दिएको जानकारी अनुसार सिद्धार्थनगर नगरपालिका-१ वेलहियाबाट अजय भारतीलाई पक्राउ गरिएको हो ।

प्रतिव्यक्ति एक हजार देखि ५ हजार रुपैयाँसम्म रकम लिई अवैध रुपमा नेपाल प्रवेश गराएको भन्दै भारत उत्तर प्रदेश महाराजगंज जिल्ला मदरा बस्ने २० वर्षीय अजयलाई प्रहरीले पक्राउ गरेको हो । सार्वजनिक बाटोमा आवतजावत गर्ने पैदल यात्रीहरुसँग रकम लिने गरेको र नदिएमा झैझगडा गर्ने गरेकोले निजलाई पक्राउ गरि अभद्र व्यवहारमा कानून वमोजिम कारवाही अगाडि बढाइएको प्रहरीले जनाएको छ ।

कोभिड-१९ का कारण सिमानाका अझै पनि सिल गरिएको छ । तर पैसा लिएर मान्छेहरुलाई अवैध ढंगले नेपाल भित्र्याउने काम भइरहेको स्थानीयले बताएका छन् ।