कल्पनाको ‘चुल्ठो’ कविता संग्रह लोकार्पण

काठमाडौँ : कवि कल्पना चिलुवालको ‘चुल्ठो’ कविता संग्रह लोकार्पण भएको छ । लेखक तथा विश्लेषक उज्जवल प्रसाईं र राजनीतिकर्मी मानुषी यमी भट्राईले शनिबार काठमाडौँको मण्डला थिएटरमा चिलुवालको कविता संग्रह लोकार्पण गरेका हुन् । 

लोकार्पणपछि संग्रहको समालोचना गर्दै प्रसाईंले कविता संग्रहलाई कलात्मक र बौद्धिक हस्तक्षेपको रुपमा व्याख्या गरे । यो हस्तक्षेपलाई राम्रोसँग आलोचना वा टिप्पणी गरी चर्चाको विषय बनाउन सकेमा यसले पाठकलाई अझै बढी सचेत र संवेदनशील हुन सघाउने उनले दाबी गरे । 

उनका अनुसार चिलुवालका कवितामा देशका खलनायकहरुको बारेमा उल्लेख छ । ‘उहाँका कवितामा खलनायकहरु छन् । दादागिरी देखाइरहेको, हिजो आफै हिँडेर आएको बाटोलाई दुत्कारिरहेको शासकहरू, सत्ता, सरकार, स्वयम् राज्य र बजार पनि एउटा खलनायकको रूपमा देखिएका छन्,’ उनी भन्छन्, ‘अहिले हामी पनि यी खलनायकहरूविरुद्धमा लड्न खोजिरहेका छौँ । आन्दोलन गरिरहेका छौँ । यस्तो समयमा यो पुस्तक निकै सान्दर्भिक छ ।’
  
राजनीतिकर्मी भट्टराईले चिलुवालका कविता युवापुस्ताको लागि सान्दर्भिक रहेको बताइन् । उनले भनिन्, ‘कवितामा कविले बजार, पुँजीवाद, सत्ता सञ्चालन गर्ने व्यवस्थामा पनि प्रहार गरेको देखिन्छ । त्यसको संकट र जटिलता पनि केलाउनु भएको छ । जुन युवाले बुझ्‍न जरुरी छ ।’ त्यस्तै चिलुवालले कवितामा लैंगिक, जातीय, पर्यावरणीयका साथै सहरीकरणका मुद्दालाई मिठासपूर्ण ढंगले लेखेको भट्टराईले दावी गरिन् । 

कवि चिलुवालले कवितालाई ‘सत्य बोल्ने माध्यम’को रूपमा व्याख्या गरिन् । उनले भनिन्, ‘कला मानव जीवन र श्रमसँग जोडिएको यथार्थ आत्मसात् गरेपछि त अझ म यसैसित यात्रारत हुन पुगेँ र आफ्नो बर्कतले भ्याएसम्म कविता सिर्जना गरेँ ।’ ‘चुल्ठो’ कवितासंग्रह बेला पब्लिकेसन्स्ले छापेको हो ।