आफ्नै कलाकारलाई सहयोग जुटाउन मलयालमका १ सय ४५ कलाकार एकै फिल्ममा

मुम्बई :   मलयालमका फिल्म उद्योगका १ सय ४५ कलाकारले एकै फिल्ममा अभिनय गर्ने भएका छन् ।‘ दि एसोसिएसन अफ मलयालम मुभी आर्टिस्ट’ (अम्मा)ले संस्थाका लागि सहयोग जुटाउने उद्देश्यसहित फिल्म बनाउने निर्णय गरेको हो । 

फिल्म बनाउने घोषणा मलयालम सिनेमाका मेगास्टार मोहनलालले गरेका हुन् । फिल्मलाई अम्माका लागि आशीर्वाद फिल्मले प्रस्तुत गर्नेछ । फिल्मको निर्देशन प्रियदर्शन र टी.के. राजिवकुमारले संयुक्त रुपमा गर्नेछन् । फिल्मको कथा तथा पटकथा पनि दुवैले संयुक्त रुपमा लेखिरहेका छन् । फिल्म थ्रीलर विधाको हुने जानकारी गराइएको छ । 

एसोसिएसनले मलयालम आर्थिक अवस्था कमजोर भएका अभिनेतालाई पेन्सन दिँदै आएको छ । यसका लागि संघले सदस्यबाट वार्षिक डोनेसन लिने र यसअघि संघले बनाएको फिल्मबाट उठेको पैसा प्रयोग गर्ने गरेको छ । 

संघले सन् २००८ मा यसैगरी मलयालमका अधिकांश ठूला स्टारलाई लिएर ‘२०–२०’ शीर्षकको फिल्म बनाएको थियो । मोहनलाल, ममुटी, सुरेश गोपी, जयराम आदि कलाकारको अभिनय रहेका फिल्म रिलिजको समयमा सबैभन्दा धेरै पैसा कमाउने फिल्मको रुपमा दर्ज थियो । सन् २०१३ मा मात्र धेरै कमाउने फिल्ममा यसको रेकर्ड अरु फिल्मले तोडेका थिए ।