कार्यवाहक वडाध्यक्षको कोठामा युवती मृत फेला

प्रतिकात्‍मक तस्‍बिर

कैलाली : कैलालीमा एक जनप्रतिनिधिको कोठामा युवती मृत फेला परेकी छन् । जिल्लाको गौरीगंगा नगरपालिका-३ का कार्यवाहक वडाध्यक्षसमेत रहेका निरज चौधरीको कोठामा २२ वर्षीय सञ्‍जिता चौधरी मृत अवस्थामा फेला परेकी हुन् ।

चौधरीको कोठामा बाहिरबाट ताल्चा लगाएको अवस्थामा शव फेला परेको हो । जिल्ला प्रहरी कार्यालय कैलालीका प्रवक्ता प्रहरी नायब उपरीक्षक प्रतीक बिष्टले घटनास्थलमा ईलाका प्रहरी कार्यालय मालाखेतीका प्रहरी नायब उपरीक्षक प्रेमबहादुर शाहीको नेतृत्वमा टोली खटाइएको बताए । 

घटनापछि कार्यवाहक वडाध्यक्ष चौधरी भने सम्पर्कविहीन भएका छन् । मृतकका आफन्तले चौधरीसंग प्रेम सम्बन्ध रहेको बताएका छन् । वडाध्यक्ष नरेन्द्र शाहको केही महिनाअघि कोरोना भाइरसका कारण मृत्यु भएको थियो । त्यसपछि वडा सदस्य चौधरीलाई कार्यवाहक अध्यक्षको जिम्‍मा दिइएको थियो ।