भागरथी भट्टको हत्याको निष्पक्ष छानबिन गर्न कांग्रेस महिला विभागको माग

काठमाडौँ  : बलत्कारपछि हत्या गरिएकी बैतडी, दोगडाकेदार गाउँपालिकाकी भागरथी भट्टको हत्यारालाई कारबाही गर्न नेपाली कांग्रेसकाे केन्द्रीय महिला विभागले माग गरेकाे छ । विभागले आइतबार विज्ञप्ति जारी गरी घटनाको निष्पक्ष छानबिन गरी अपराधीलाई हदैसम्मको कारबाही गर्न सरकारसँग माग गरेकाे हाे । विभागले अनुसन्धानमा कुनै लापरबाही नगर्न चेतावनीसमेत दिएको छ । 

सनातन धर्म उच्च माविकाे कक्षा १२ मा अध्ययनरत १७ वर्षीया भागरथी लबलेक सामुदायिक बनमा मृत अवस्थामा फेला परेकी थिइन् । भागरथी को परिवारलाई उचित क्षतिपूर्ति दिन विभागले माग गरेको छ । साथै विभागले उक्त घटनाको सत्यतथ्य पत्ता लगाई पीडितलाई न्याय दिलाउन नेपाली कांग्रेस जिल्ला कार्यसमिति वैतडीसँग समन्वय गरी स्थलगत अवलोकन गर्न केन्द्रीय महिला विभागका सदस्य राधिका सिहंलाई खटाएको छ । 

साँढे २ वर्ष पहिले कञ्‍चनपुरमा निर्मला पन्तको हत्यारालाई पनि सरकारले अहिलेसम्म पक्राउ गरी कारबाही गर्न सकेको छैन । गत असोजमा मष्टा गाउपालिका बझाङमा १२ वर्षिया बालिका सम्झना कामीको बलात्कार र हत्याको घटना पनि महिलामाथि हुने गरेका जघन्य अपराधको एउटा कडी भएको उल्लेख गर्दै विभागले महिलाविरुद्ध सिलसिलेवार रुपमा हुने गरेका यस्ता हत्या र हिंसालाई तोड्न माग गरेको छ । 

‘महिला माथि हुने गरेका अनवरत हिंसाका श्रृखंलाले सिङ्गो राष्ट्र र समाज आतङ्कित छ,’ विभागको विज्ञप्तीमा भनिएको छ, ‘यसका नीम्ति राजनीतिक पार्टी, विभिन्न संघ-संस्थाहरु, पेशाकर्मीलगायत सिंगो समाज अपराधको खिलाफमा खडा रहनु आजको मूल आवश्यक्ता हो । यीनै प्रयासहरुले अपराधीको बढेको मनोबल घटाउन र दण्डहिनताको अन्त्य गर्ने वातावरण बनाउन सकिन्छ ।’