चौदण्डीगढीको पोष्टमा एपीएफको १४ गोल

तस्बिर : एन्फा

काठमाडौँ : काठमाडौँमा जारी महिला राष्ट्रिय लिगमा विभागीय टोली एपीएफले चौदण्डीगढी नगरपालिकामाथि १४-० को फराकिालो जित निकालेको छ । टीमका लागि सावित्रा भण्डारी एक्लैले ८ गोल गरिन । 

ललितपुर स्थित अखिल नेपाल फुटबल संघ (एन्फा) मुख्यालयको मैदानमा सम्पन्‍न खेलमा जारी लिगमा कमजोर देखिएको चौदण्डीगढीमाथि एपीएफले गोलको वर्षा गरेको हो । फराकिलो जित निकालेको एपीएफले क्लबले राष्ट्रिय महिला लिग फुटबलमा आफ्नो अपराजित यात्रालाई सोमबार पनि कायम नै राखेको छ ।

फराकिलो जित निकाल्दा सावित्राका अलावा अनिता बस्‍नेत र अनिता केसीले २/२ गोल गरे । अनु लामा र रविना लामाले एक/एक गोल गरे । पहिलो हाफमा ७ गोल गरेको एपीएफले दोस्रो हाफमा पनि ७ गोल थपेर फराकिलो जित निकालेको हो ।

पहिलो चरणको खेलमा चोदण्डीगढीमाथि २२ गोल गरेको एपीएफले ७ खेलबाट स्पष्ट जित निकाल्दै शीर्षता कायम राखेको छ । एपीएफले ७ खेलमा २१ अंक जोडेको हो । एपीएफ लिगमा अपराजित रहने एक्लो टिम हो । 

पराजित चौदण्डीको यो लगातार सातौं हार हो । अहिलेसम्म तालिकामा अझै खाता खोल्न नसकेको चौदण्डीगढीले अंक विहीन रहदै पुछारमा छ । अहिलेसम्मका खेल सम्पन्‍न हुँदा चौदण्डीगढीले सबै खेलमा गरेर कुल ८६ गोल खाँदा एक गोल गरेको छ भने एपीएफले एक गोल पनि खाएको छैन । ७ खेल सम्पन्‍न हुँदा एपीएफले कुल ५७ गोल गरेको छ ।