भारतविरुद्धको पहिलो टेस्टमा इंगल्यान्ड विजयी

काठमाडौँ: भारत भ्रमणमा रहेको इंगल्यान्डले पहिलो टेस्टमा मंगलबार घरेलु टोलीलाई दुई सय २७ रनले पराजित गरेको छ । चेन्‍नाईमा जेम्स एन्डरसनले धारिलो बलिङ गरेपछि इंगल्यान्डले पाँचौ दिनमा जित दर्ता गर्‍यो । 

सन् २०१२ यता घरेलु मैदानमा सम्पन्‍न ३५ खेलमध्ये एकमा मात्रै हार व्यहोेरेको भारतविरुद्ध पछिल्ला चार दिन पाहुना टोलीले लगातार दबाब सिर्जना गर्‍यो । ३८ वर्षीय एन्डरसनले एउटै ओभरमा भारतका महत्वपूर्ण दुई ब्याट्सम्यानलाई पभेलियन फर्काए । ओपनर शुभम गिल ५० रन बनाएर आउट हुँदा रहाने शुन्यमा सिमित भए । त्यस्तै एन्डरसनकै बलमा रिसभ पन्त ११ रनमा पभेलियन फर्के । 

इंगल्यान्डका लागि ज्याक लिचको बलिङ पनि महत्वपूर्ण सावित भयो । लिचले ७६ रन खर्चेर चार विकेट हात पारे । भारतलाई पराजित गरेसँगै इंगल्यान्डले घर बाहिर छैठौँ जित हासिल गर्‍यो । दक्षिण अफ्रिका र श्रीलंकालगायतका टोलीलाई हराएको इंगल्यान्ड सन् १९१४ यताकै उत्कृष्ट लयमा छ ।