राष्ट्रपतिज्यू, आफैले बसाएको नजिर आफैमाथि भारी नहोस- विष्णु रिजाल

काठमाडौँ : नेकपाका नेता विष्णु रिजालले गणतन्त्रमा बोलेकै आधारमा पक्राउ गर्न लगाउनु राष्ट्रपति विद्यादेवी भण्डारीको गम्भिर त्रुटि हुने बताएका छन् । बोलेकै आधारमा नेतृ रामकुमारी झाँक्रीलाई पक्राउ गर्न प्रहरी घरमा पुगेको सन्दर्भमा ट्वीट गर्दै नेकपाका युवा नेता विष्णु रिजालले अभिव्यक्ति स्वतन्त्रता, गणतन्त्र र नागरिकको पक्षमा बोल्नेलाई पक्राउ गर्न लगाउनु गम्भिर त्रुटि हुने बताएका हुन् ।

गणतन्त्रमा गणतन्त्रका लागि रगत बगाउने झाँक्रीलाई आलोचना गरेकै भरमा पक्राउ गर्न लगाउनु राष्ट्रपति भण्डारीकै लागि भारी हुने उनले टिप्पणी गरेका हुन् । आज बोलेकै आधारमा झाँक्रीलाई पक्राउ गर्दा भोलि आफै पक्राउ पर्ने सम्भावनाको पनि ख्याल गर्न रिजालको भनाई छ ।

‘आज गणतन्त्रमा गणतन्त्रका लागि रगत बगाउने रामकुमारी झॉक्रीलाई ‘राष्ट्रपतिको आलोचना गरेको’ अभियोगमा गिरफ्तार ! हेक्का रहोस् – आफूले बसालेको नजीर कुनै दिन आफैंमाथि भारी नहोस्’ रिजालले ट्वीटमा लेखेका छन् ।

साथै उनले हिजोका दिनमा राजा वीरेन्द्रको वंश विनास ज्ञानेन्द्र र पारसले गरेका हुन् भनेर लेख्दा बोल्दा कसैमाथि मुद्दा नलगाएपनि अहिले बोलेकै आधारमा झाँक्रीलाई पक्राउ गर्न लगाउनु नियतमै शंका रहेको पनि ट्वीटमा उल्लेख गरेका छन् ।

‘राजतन्त्र भएको बेलामा ‘पम्फादेवीका नाममा रानी ऐश्वर्यले स्वीस बैंकमा पैसा राखेकी छन्’ भनेर सडकमा नारा लाग्दा कोही समातिएन । ‘राजा वीरेन्द्रको बंश विनाश ज्ञानेन्द्र र पारसले गरेका हुन्’ भनेर बोल्दा–लेख्दा कसैमाथि मुद्दा लगाएको सुनिएन ।’