सांसद विश्‍वकर्माको उपचारमा गम्भीर बन्‍न सरकारलाई कांग्रेसको आग्रह

काठमाडौं : प्रमुख प्रतिपक्षी दल नेपाली कांग्रेसले पार्टीका केन्द्रीय सदस्य तथा प्रतिनिधिसभाका सांसद मीन विश्‍वकर्माको उपचारमा सहयोग गर्न सरकारलाई विशेष अनुरोध गरेको छ ।
 
कांग्रेसका प्रमुख सचेतक बालकृष्ण खाणले शनिबार प्रधानमन्त्री केपी शर्मा ओली र स्वास्थ्य तथा जनसंख्या मन्त्री भानुभक्त ढकालसँग सांसद विश्‍वकर्माको उपचारमा गम्भीर बन्‍न आग्रह गरेका हुन् । विश्‍वकर्मा कोभिड-१९ संक्रमित भएर पहिला वीर अस्पतालमा र बढी भएपछि अहिले ग्राण्डी अस्पतालमा उपचाररात छन् । 

प्रमुख सचेतक खाणले शनिबार प्रधानमन्त्री ओली र स्वास्थ्य तथा जनसंख्यामन्त्री ढकाललाई टेलिफोन गरी विश्‍वकर्माको उपचारमा गम्भीर बन्‍न अनुरोध गरेका हुन । विश्‍वकर्मा कात्तिक ९ गते कोभिड संक्रमित भएका थिए । 

विश्‍वकर्माको फोक्सोमा निमोनिया भएको र श्‍वासप्रश्‍वासमा समस्या देखिएपछि धापासीस्थित ग्राण्डी अन्तर्राष्ट्रिय अस्पतालमा भेन्टीलेटरमा राखी उपचार भइरहेको छ । उनको अवस्था गम्भीर बन्दासम्म पनि सरकारले उपचारमा ध्यान नदिएपछि खाणले टेलिफोन गरेरै अनुरोध गरेका हुन् ।