एसी मिलान र युभेन्टस पराजित

काठमाडौँ : इटालिएन सीरी ए फुटबलमा शीर्ष स्थानको एसी मिलान र तेस्रो स्थानको युभेन्टस पराजित भएका छन् । शनिबार राती भएका खेलमा एसी मिलान स्पेजियासँग २-० गोलले पराजित हुँदा युभेन्टस नापोलीसँग १-० गोलले स्तब्ध बन्यो ।

एसी मिलानलाई हराउन स्पेजियाका गिउलो म्यागिरे र सिमोन बस्तोनीले गोल गरे । स्पेजियाको डिफेन्सका अगाडी मिलानका स्ट्राइकर गोल गर्न असफल रहे । ५४ प्रतिशत बल पोजिसनमा राखेपनि मिलानले ७ वटा प्रहार गरेको थियो ।

स्पेजियाले १७ प्रहार गर्दा दुई गोल गर्न सफल भयो । हार व्यहोरेपनि एसी मिलान २२ खेलबाट ४९ अंकसहित शीर्ष स्थानमा कायमै छ । स्पेजिया भने समान खेलबाट २४ अंकसहित १४ औँ स्थानमा छ ।

यस्तै युभेन्टसलाई हराउन नापोलीका लागि लोरेन्जो इन्सिग्निले गोल गरे । उनले खेलको ३१ औँ मिनेटमा पेनाल्टीमा गोल गरेका हुन् । हार व्यहोरेपनि युभेन्टस २१ खेलबाट ४२ अंकसहित तेस्रो स्थानमा कायमै छ । समान खेलबाट ४० अंक जोडेको नापोली भने चौथो स्थानमा उक्लिएको छ ।