बाँकेमा बेवारिसे शव व्यवस्थापन सुरु

नेपालगञ्ज : बाँकेमा बेवारिसे अवस्थामा रहेका शव व्यवस्थापन तथा सदगद् गर्ने कार्य सुरु भएको छ । लामो समयदेखि काठमाडौंलगायतका प्रमुख सहरहरुमा बेवारिसे लासहरु व्यवस्थापन गर्दै आएको बेवारिसे व्यवस्थापन तथा पुनर्जीवन केन्द्रको शाखाले बाँकेमा पनि सो कार्य सुरु गरेको हो ।

संस्थाका केन्द्रीय अध्यक्ष बिनय जंग बस्नेतको उपस्थितिमा बाँकेमा सो संस्थाको शाखा बिस्तार भएपछि शाखाले बेवारिसे अवस्थामा रहेको शव व्यवस्थापन कार्य सुरु गरेको बाँके संयोजक पुजा विश्वकर्माले बताइन् । उनका अनुसार, केही दिन अघि मात्रै पहिचान नखुलेका करिब ५५ वर्षीय पुरुषको अन्तिम दाहसंस्कार संस्थाले बाँके र बर्दियाको सिमानामा रहेको मानखोलामा गरेको थियो ।

संस्थाले शनिबार मात्रै निल सागर बृद्धाश्रममा दुई जना बेवारिसे अवस्थामा रहेका व्यक्तिहरुको सदगद् गरेको छ । बृद्धाश्रममा आश्रित रहेकी महिला करिब ६० वर्षीया चन्द्रकला नामले बोलाइने महिलाको दुई दिन अघि मृत्यु भएको थियो । उनको शव भेरी अस्पताल नेपालगञ्जको शव गृहमा राखिएको थियो । उनको शवका अलावा १ महिना अघिदेखि करिब  ७० वर्षीया पहिचान नखुलेका पुरुषको शव भेरी अस्पतालको शव गृहमा थियो ।

शव गृहमा रहको उक्त २ जना १ महिला, १ पुरुषको शव संस्थाले शनिवार नेपालगञ्जस्थित बुलबुलैया समसाघाटमा सदगद् गरेको छ । केन्द्रीय अध्यक्ष बिनयजँग बस्नेतको उपस्थितीमा जिल्ला संयोजक पुजा विश्वकर्मा, कार्यकारी निर्देशक भुपेन्द्र बस्नेत, पुनम गुरुङ, सहसचिव समुना पोखरेल र सहकारीकर्मी अम्बिका काफ्लेलगायतले मृतक दुई जनाको अन्तिम दाहसंस्कार गरेका थिए ।