कस्तो आन्दोलन घोषणा गर्दैछ दाहाल-नेपाल समूह ?

काठमाडौँ: प्रतिनिधि सभा विघटनविरुद्ध चरणबद्ध आन्दोलन गरिरहेको नेकपा दाहाल-नेपाल समूहले आइतबार फेरि नयाँ आन्दोलनका कार्यक्रम घोषणा गर्दैछ । आइतबार पार्टी केन्द्रीय कार्यालय पेरिसडाँडामा पत्रकार सम्मेलन गरेर नयाँ आन्दोलनका कार्यक्रम घोषणा गर्न लागिएको दाहाल-नेपाल समूहले जनाएको छ ।

दाहाल-नेपाल समूहका युवा नेता विष्णु रिजालका अनुसार कामचलाउ सरकारका प्रधानमन्त्री केपी शर्मा ओलीको प्रतिगमनविरुद्ध थप संघर्षका कार्यक्रम घोषणा गर्न लागिएको हो । सर्वोच्चमा प्रतिनिधि सभा विघटनविरुद्ध मुद्दा चलिरहेका बेला दाहाल-नेपाल समूह सडक संघर्षमै केन्द्रित भएको छ । 

काठमाडौँ, विराटनगर, बुटवल र धनगढीमा शक्ति प्रदर्शन गरेको दाहाल-नेपाल समूहले थप रचनात्मक आन्दोलन गर्ने तयारी गरेको छ । विघटित प्रतिनिधि सभा पुनःस्थापना दाहाल-नेपाल समूहको मुख्य माग हो ।