कर्णाली प्रदेश सरकारका मुख्य न्यायाधिवक्ताले दिए राजीनामा

सुर्खेत : कर्णाली प्रदेश सरकारका मुख्य न्यायाधिवक्ता विद्याभुषण मानन्धरले राजीनामा दिएका छन् । आइतबार सामाजिक सञ्‍जाल फेसबुकमार्फत आफूले मुख्य न्यायाधिवक्ताबाट राजीनामा दिएको बताएका हुन् ।

फेसबुकमा स्टाट्समा मानन्धरले आफूले निजी व्यस्तताका कारण राजीनामा दिएको बताएका छन् । उनले लेखेका छन्, ‘यो ऐतिहासिक जिम्मेवारी प्रदान गर्ने कर्णाली प्रदेश सरकारप्रति हार्दिक आभार व्यक्त गर्दै मेरो निजी कार्यव्यस्तताका कारण आफूले सम्हाल्दै आएको जिम्मेवारीमा रहिरहन नसक्ने भएकोले आजका मितिबाट राजीनामा दिएको व्यहोरा जानकारी गराउँदछु ।’

२०७४ चैत २८ गते मानन्धर कर्णाली प्रदेश सरकारका मुख्य न्यायाधिवक्ता नियुक्त भएका थिए । उनले २ बर्ष १० महिना मुख्य न्यायाधिवक्ता भएर काम गरे । आफ्नो कार्यकाल समयमा आफूले सफलता प्राप्त गरेको पनि उनले बताएका छन् ।