दक्षिण अफ्रिकाविरुद्धको टी-ट्वेन्टी सिरिज पनि पाकिस्तानले जित्यो

फोटो : पाकिस्तान किक्रेट

काठमाडौँ : दुई खेलको टेस्ट सिरिजपछि पाकिस्तानले टी-ट्वेन्टी क्रिकेट सिरिज पनि जितेको छ । आइतबार राती भएको तेस्रो तथा निर्णायक टी-ट्वेन्टी क्रिकेटमा ४ विकेटको जित हात पारेसँगै दक्षिण अफ्रिकाविरुद्धको तीन खेलको टी ट्वेन्टी सिरिज पाकिस्तानले २-१ ले जितेको हो ।

लाहोरमा टस हारेर पहिले ब्याटिङ गरेको दक्षिण अफ्रिकाले निर्धारित २० ओभरमा ८ विकेट गुमाएर १६४ रन बनायो । मध्यम चुनौति पछ्याउँदै जवाफी ब्याटिङ गरेको पाकिस्तानले ८ बल बाँकी छदै ६ विकेट गुमाएर १६९ रन बनाउँदै लक्ष्य भेट्टायो ।

पाकिस्तानलाई जिताउन मोहम्मद रिजवानले ४४ र कप्तान बाबर अजामले ४२ रन बनाए । हसन अलिले ७ बलमा दुई छक्का र एक चौकासहित नटआउट २० रन बनाउँदै टिमलाई जिताए । दक्षिण अफ्रिकाका तेब्रिज सास्मीले चार विकेट लिए ।

पाकिस्तानले यसअघि दुई खेलको टेस्ट क्रिकेट सिरिज पनि जितेको थियो । टेस्ट र टी-ट्वेन्टी सिरिज गुमाएको दक्षिण अफ्रिकाले पाकिस्तान भ्रमणमा सान्तवनाका रुपमा एउटा टी-ट्वेन्टी खेल मात्रै जित्न सक्यो ।