‘कोभिडभन्दा समाजको तिरस्कार जित्न गाह्रो’

पोखरा : पोखराका फोटो पत्रकार राम गुरुङ बाहिर निस्कँदा अनिवार्य मास्क लगाउँथे । सेनिटाइजर र पन्जाको पनि प्रयोग गर्थे । भौतिक दूरी कायम गरेकै थिए । भेटघाट पातलिएको थियो । 

तर उनलाई सामान्य शरीर, ढाड र छाती दुख्ने जस्ता लक्षण देखियो । कोभिड १९ सँग मिल्दोजुल्दो लक्षण देखिएपछि उनले असोज २१ गते स्वाब दिए । २३ गते बेलुका उनको रिपोर्ट पोजिटिभ आयो ।

२४ वर्ष अगाडि मुटुको भल्ब फेरेर लगातार औषधि खाइरहेका उनलाई कोभिड १९ संक्रमण भैहाले पनि केही हुँदैन भन्ने त लागेको थियो । तर मुटु रोगी भएकाले स्वभाविक रुपमा डर पनि थियो । डर लागे पनि गुरुङले आत्मबल बलियो राखे ।  

मुटुको भल्ब फेरे पनि उनी कहिल्यै मुटुरोगी हुँ भनेर बसेनन् । सगरमाथा र अन्नपूर्ण हिमाल आधार शिविरका म्याराथानमा भाग लिए । उचाइमा जाँदा समस्या हुने हेक्का हुँदाहुँदै पनि आत्मबल बढाएर ५ हजार ६ सय १६ मिटर उचाइको भन्ज्याङ थोरङ सजिलै पार गरे ।

त्यही आत्मबलकै कारण गुरुङले कोरोनाबाट मुक्ति पाएका छन् । संक्रमण पुष्टि भएको २५ औं दिनमा गुरुङ कोभिडमुक्त भएका छन् । कोरोनाबाट बच्न आत्मबल उच्च बनाएर सतर्कता अपनाउनुपर्ने उनको सुझाव छ । ‘संक्रमितले उच्च बनोबल राख्नुपर्छ । खानपानमा ध्यान दिनोस् ।’ उनी भन्छन्, ‘रसिलो पोषिलो तातो झोल, बेसार पानी, प्रोटिनयुक्त खाना, फलपूmल खानोस्, ‘फ्रिजमा राखेको चिसो केही पनि सेवन नगर्नोस् । रक्सी, चुरोट त छुँदै नछुनोस् । बस यति गरेपछि तपाइँले पनि मैले जस्तै सजिलै कोरोनालाई परास्त गर्नु हुन्छ ।’

दिर्घरोगीलाई कोरोना लागेपछि ज्यानै जान्छ भन्ने हल्ला छ । तर गुरुङले त्यसलाई गलत सावित गरिदिएका छन् । आफू मुटुरोगी भए पनि कोरोना जितेका छन् । ‘मुटुरोग लागेपछि जीवन नै सकियो जस्तो गरी पीर मानेको देखेको छु । सुनेको छु ।’ गुरुङ भन्छन् ‘समस्या पीर मानेर सुल्झिँदैन । के खान हुने के नहुने हेक्का राखेर अनुशासित बन्नुपछ । उनी कोरोना लागेका सबैलाई उच्च मनोबल बनाउन सुझाव दिन्छन् । 

रोगले भन्दा पनि तनावले ज्यान लाने हो कि भनेर उनले आफैंले आफैंलाई सम्झाइरहे । उनी कोरोना संक्रमण हुँदा कहिल्यै नकारात्मक सोचेनन् । कोरोना जित्छु भनेर सकारात्मक नै सोचिरहे । गुरुङ भन्छन्, ‘धेरैले कोरोना जितिरहेका छन् भने मैले पनि कोरोनालाई जित्छु भन्ने ठानेँ । मरिन्न भनेर ढुक्क बसेंँ ।’ उनी जतिनै सकारात्मक बसे पनि मानसिक असर भने खेपेको बताउँछन् । ‘तर, पनि यो बीचमा खेपेका मानसिक असरहरु थुप्रै छन् । सामाजिक दुव्र्यवहार र अपहेलना अझै जित्नै बाँकी नै छ, कोभिडभन्दा समाजको तिरस्कार जित्न गाह्रो’ उनले थपे । 

संक्रमितलाई माया र प्रेरणा दिनुपर्ने उनको तर्क छ । कोरोना निको पार्ने औषधि आफन्त र साथीसंगीको शुभेच्छा, हौसला र प्रेम रहेको उनको अनुभव छ । ‘कोरोना संक्रमण हुनु भनेको ठूलै अपराध गरे जस्तो व्यवहार समाजमा संक्रमितले भोगिरहेका छन्,’ भन्छन्, ‘त्यसैले कोरोना संक्रमितलाई हेला नगरौं, ऊर्जा दिऔं ।’