कोभिड-१९ संक्रमणबाट बाराका कांग्रेस नेता मण्डलको निधन

बारा : बाराका नेपाली कांग्रेस महासमिति सदस्य मदन मण्डलको कोभिड-१९ संक्रमणका कारण आइतबार निधन भएको छ । बाराको आदर्शकोतवाल गाउँपालिकाको टेढाकट्टी घर भएका ५२ वर्षीय मण्डलको उपचारका लागि काठमाण्डौ लैजाने क्रममा बाटोमै बिहान मृत्यु भएको काँग्रेस महासमिति सदस्य लोकेश सिंहले जानकारी दिए ।
 
३ दिन पहिले श्‍वासप्रश्‍वासमा समस्या भएर विरामी परेपछि उनलाई बाराकै एक स्वास्थ्य संस्थामा भर्ना गरिएको तर उपचारकै क्रममा कोभिड संक्रमणको लक्षणसंग मिल्दोजुल्दो लक्षण देखीएपछि शनिवार वीरगन्जस्थित नारायणी अस्पतालमा ल्याइएको थियो । त्यही दिन स्वाब संकलन गरि पीसीआर परीक्षण गर्दा मण्डलको रिपोर्ट पोजेटिभ आएको थियो । त्यसपछि नारायणी अस्पतालका चिकित्सकले वीरगन्जकै कोभिड अस्पतालमा लैजान सुझाएका थिए ।
  
नारायणी अस्पतालका चिकित्सक डाक्टर दीपक चौरसियाका अनुसार मण्डललाइ नारायणी अस्पताल ल्याउँदा अवस्था गम्भीर थियो । पहिलादेखिनै उच्च रक्तचापको समस्या  रहेका उनमा पछिल्लो समय खोकी लाग्‍ने र श्‍वास फेर्न गाह्रो भइरहेको थियो । 

तर आफन्तले वीरगञ्‍जभन्दा काठमाण्डौँमा छिटो निको हुने भन्दै काठमाडौँको नर्भिक अस्पतालमा लैजाने क्रममा मण्डलको  आइतवार बिहान बाटोमै मृत्यु भएको सिंहले बताए ।