आरोपित दिनेशले बुवाकै अगाडि स्वीकारे बलात्कार

धनगढी :  बैतडीको दोगदाकेदार - ७ चडेपानीकी १७ वर्षीया भागरथी भट्टको हत्यामा संलग्न रहेको आरोपमा पक्राउ परेका दिनेश भट्टले बलात्कार गरेको स्वीकार गरेका छन् । यसअघि भागरथीको हत्या गरेको तर बलात्कार नगरेको बयान दिएका दिनेशले सरकारी वलिकको कार्यालय बैतडीमा आफ्ना बुवा दिपकको अगाडि भागरथीको बलात्कारपछि हत्या गरेको स्वीकारेका हुन् ।

बुधवार आयोजित पत्रकार सम्मेलनमा १८ बर्षीय भनिएका दिनेशको उमेर १६ बर्ष भएकाले मुलुकी फौजदारी कार्यविधि संहिता २०७४ को व्यवस्था अनुसार अभिभावकको रोहवरमा बयान लिईएको थियो ।

‘दुई पटक भागरथीलाई लडाए । त्यसपछि एक पटक यौन सम्पर्क गरेँ । अनी घाँटी थिचेर हत्या गरेँ भनेर बयान दिएका छन् । बयान लिने क्रममा आरोपितका बुवा पनि थिए,’ प्रदेश प्रहरी कार्यालयका प्रवक्ता प्रहरी वरिष्ठ उपरीक्षक मुकेशकुमार सिंहले भने ।

उनका अनुसार आरोपित दिनेशले घटनामा आफू एक्लै संलग्न रहेको पनि बताएका छन् । यस्तै भागरथीले हातमा लगाउने घडी फेला परेको छ । हत्याको आरोपमा पक्राउ परेका दिनेशले दिएको बयानको आधारमा आज प्रहरीले भागरथीले लगाउने गरेको रातो घडी फेला पारेको सुदूरपश्चिम प्रदेश प्रहरी कार्यालयका प्रवक्ता सिंहले बताए ।

दिनेशले भनेकै स्थानमा घडी फेला परेको उनले बताए । सनातन धर्म मावि खोचलेकबाट माघ २१ गते घर फर्किने बेला हराएकी भागरथीको २२ गते शव भेटिएको थियो । पोष्टमार्टमपछि भागरथीको बलात्कारपछि हत्या भएको पुष्टि भएको थियो ।