‘पार्टीभित्रका पदलोलुपहरूले मुलुकमा असामान्य परिस्थिति सिर्जना गरे’

विराटनगर : गृहमन्त्री रामबहादुर थापाले मुलुकमा पार्टीभित्रका अवसरवादीहरूले, फुटवादीहरूले, गुटवादीहरू तथा पदलोलुपहरूले असामान्य परिस्थिति सिर्जना गरेको बताएका छन् । नेकपा (ओली समूह)ले शनिबार विराटनगरमा आयोजना गरेको सभामा गृहमन्त्री थापाले पदलोलुपहरूले यो अवस्था निम्त्याएको बताए । 

थापाले मुलुकलाई अस्थिरतातिर धकेल्ने प्रयास भएको बताएका हुन् । ‘देशलाई अस्थिरतातिर धकेल्ने प्रयत्न गरिएको छ, प्रयास गरिएको छ,’ उनले भने, ‘यो देशमा अस्थिरता उत्पन्‍न कुनै बाह्य शक्तिहरूद्वारा होइन स्यम् हाम्रै आन्तरिक पंक्तिबाट अस्थिरताको षडयन्त्र रचियो । देशलाई अस्थिरतातिर धकेल्ने योजना, षडषन्त्र रचियो । आजको यो परिस्थिति हाम्रै पंक्ति हाम्रै पंक्तिबाट हाम्रै भित्र लुकेका अवसरवादीहरू गुटवादीहरू पद लोलुपहरूले जन्माएका हुन् ।’

पार्टीभित्रका व्यक्तिहरूले सिर्जना गरिएको अस्थिरतामा देश बाहिर र भित्रका शक्तिहरूले खेलिरहेको थापाले बताए । असामान्य परिस्थितिभित्र बाह्य र भित्री शक्तिहरू खेलिरहेका उनको भनाइ छ । तर, ती शक्ति को हुन् भन्ने उनले खुलाएनन् । 

नेकपाभित्र लुकेका अवसरवादीहरूले यो परिस्थिति सिर्जना गरेर त्यसबाट खुसी भइरहेको उनले बताए । ओलीको नेतृत्वमा आफूहरूले सुद्धिकरण अभियान सञ्‍चालन गरिरहेको थापाले बताए । 

जनताको ताजा जनादेश लिने कुरो लोकतान्त्रिक र अग्रगामी कदम भएको थापाले बताए । ‘सदन विघटन गर्ने ऐतिहासिक, क्रान्तिकारी, ठूलो राजनीतिक कदम हो, यसको साथसाथै संवैधानिक पनि छ,’ थापाले भने ।