आइपीयु गभर्निङ काउन्सीलको अधिवेशन सुरु, सभामुखसहित तीन सांसद नेपालबाट सहभागी

काठमाडौं : विश्वका संसदको साझा मञ्च अन्तर व्यबस्थापिका संघ (आइपीयु)को गभर्निङ काउन्सीलको २०६ औं अधिवेशन सुरु भएको छ । नेपाली समय अनुसार गएराति सुरु ‘भर्चुअल’ सम्मेलन चार दिनसम्म चल्ने भएको हो ।
   
जारी अधिवेशनमा नेपालका तर्फबाट संघीय संसद, प्रतिनिधि सभाका सभामुख अग्निप्रसाद सापकोटा, प्रतिनिधि सभाका सदस्य रामकुमारी झाँक्री र राष्ट्रिय सभाका सदस्य जितेन्द्र नारायण देवले गभर्निङ काउन्सील सदस्यकारुपमा सहभागीता जनाएका छन् । यस्तै अधिवेशनमा सांसद एकवाल मियाँ पर्यवेक्षकका रुपमा सहभागी भएका हुन् ।   

गभर्निङ काउन्सीलको यो अधिवेशनले आइपीयुका नयाँ अध्यक्ष निर्वाचित गर्ने छ । हरेक गभर्निङ काउन्सील सदस्यले गोप्य मतदानमार्फत अध्यक्षको चयन गर्ने छन् । मतदान ‘भर्चुअल’ माध्यमबाट भएको  छ । अधिवेशनमा नेपाल सहित १६२ देशका प्रतिनिधिहरुको सहभागीता रहेको छ । 

यो अधिवेशनमा आई पि यू को अध्यक्ष पदका लागि पाकिस्तान, पोर्चुगल, उज्वेकिस्तान र क्यानडाका प्रतिनिधिले उमेदवारी दिएका छन् । आइपीयु अध्यक्षको कार्यकाल तीन बर्षको हुने छ । 

यसैबीच नेपालबाट अन्तर व्यबस्थापिका संघको गभर्निङ काउन्सीलको २०६ औं अधिवेशनमा सहभागी सभामुख अग्निप्रसाद सापकोटासहित प्रतिनिधि सभाका सदस्य रामकुमारी झाँक्री र राष्ट्रिय सभाका सदस्य जितेन्द्र नारायण देवले आईपीयु अध्यक्ष चयनका लागि गोप्य मतदान गरेका छन् ।