पहिलो पल्ट रणवीर-श्रद्धा  सँगै

रणवीर कपुरसँग काम गर्ने हरकोही हिरोइनको चाहाना हुन्छ । ‘सञ्जु’ रिलिजपछि फेरि एक पटक रणवीरले आफूलाई अभिनयमा अब्बल साबित गरेका थिए । नत्र त अघिल्ला केही रिलिजले उनको करिअरमा ग्रहणको संकेत गरेका थिए । त्यो पछि रणवीरले दुई फिल्मको काम गरिरहेका छन् ‘ब्रम्हास्त्र’ र ‘शमशेरा’ ।

दुवै फिल्मलाई ठूलो अपेक्षासाथ हेरिएको छ । तर, यसैबीच उनले तेस्रो फिल्म साइन गरेको खबर छ । यो फिल्म हो ‘प्यारका पञ्‍चनामा’ फेम्ड निर्देशक लव रञ्‍जनको । यो फिल्ममा रञ्‍जनले रणवीरको जोडीको रुपमा श्रद्धा कपुरलाई साइन गरेको खबर छ ।
  
रोमान्टिक कमेडी विधाको यो फिल्ममा रणवीर र श्रद्धाले पहिलोपल्ट स्क्रिन सेयर गर्न लागेका हुन् । फिल्ममा अजय देवगण पनि मुख्य भूमिकामा देखिने चर्चा छ । दीपिका पादुकोन र रणवीर कपुरको जोडी बलिउडमा सुहाउने जोडीको रुपमा परिचित छ । अफेयरमा हुन्जेलमा रणवीर र कट्रिना कैफको जोडी पनि राम्रै मानिन्थ्यो । अहिले रणवीर आलिया भट्टसँग चक्कर चलाइरहेका छन् । 

तर, दुवैले सँगै अभिनय गरेको फिल्म  ‘ब्रम्हास्त्र’ रिलिज भइसकेको छैन । त्यसैले जोडीले कस्तो प्रतिक्रिया पाउँछ ? अनुमान मात्र गर्न सकिन्छ । यही बीच श्रद्धा र रणवीरको जोडी बाँधिएको खबर छ । खबर सार्वजनिक भएसँगै दुवैका फ्यान उत्साहित छन् । तर, यो उत्साह फिल्म रिलिजपछि रहन्छ कि रहन्न ? प्रतीक्षाको विषय रहनेछ ।