उम्मेद्वारी दर्ता गर्दै प्रधानले भने ‘शेखर गोल्छालाई सहयोग गर्न उम्मेद्वार बनेको हुँ’

काठमाडौं : नेपाल उद्योग वाणिज्य महासंघको मंसिर दोस्रो साता हुने चुनावी साधरणसभाका लागि वर्तमान उपाध्यक्ष किशोर श्रेष्ठले प्यानलसहित उम्मेद्वारी दर्ता गराएका छन् । सोमबार ललितपुरको भिभान्ता होटलमा उम्मेद्वारी घोषणा र महासंघका वरिष्ठ उपाध्यक्ष एवं भावी अध्यक्ष शेखर गोल्छाको शुभकामना लिएर प्रधानको प्यानलले उम्मेद्वारी घोषणा गरेको हो । प्रधान प्यानलबाट जिल्ला, नगर उपाध्यक्षमा दीनेश श्रेष्ठ, वस्तुगत उपाध्यक्षमा अन्जन श्रेष्ठ र एसोसिएटतर्फको उपाध्यक्षमा सौरभ ज्योति उम्मेद्वार छन् ।

महासंघको ५४औं साधरणसभा मंसिर ११ देखि १३ सम्मका लागि तय भएको छ । महासंघको विधान अनुसार, वरिष्ठ उपाध्यक्ष अर्को कार्यकालमा स्वतः अध्यक्ष बन्ने प्रावधानका कारण वरिष्ठ उपाध्यक्षका उम्मेद्वारहरु प्यानलसहित प्रतिस्पर्धामा छन् । साधरणसभापछि महासंघको अध्यक्ष बन्न लागेका वर्तमान वरिष्ठ उपाध्यक्ष शेखर गोल्छाले खुलेरै प्रधानको प्यानललाई समर्थन गरेका छन् । उम्मेद्वारी दर्तापछि वरिष्ठ उपाध्यक्षका उम्मेद्वार श्रेष्ठले शेखर गोल्छाको नेतृत्वलाई सहयोग गर्न आफूले उम्मेद्वारी दिएको भन्दै सघाउन उद्यमी, व्यवसायीहरुलाई आह्वान गरे । विराटनगरका व्यवसायी प्रधान लामो समयदेखि महासंघको राजनीतिमा सरिक छन् ।

अघिल्लो निर्वाचनमा भने वरिष्ठ उपाध्यक्षको दौडमा प्रधान शेखर गोल्छासँगै प्रतिस्पर्धामा थिए । गत स्थानीय निर्वाचनमा तत्कालीन नेकपा एमालेबाट म्याग्दी जिल्लाको बेनी नगरपालिकाको मेयरको उम्मेद्वार बनेपछि जिल्ला, नगर उपाध्यक्ष रहेका प्रमोद श्रेष्ठको पद महासंघको कार्यकारिणी समितिले खारेज गरेको थियो । त्यसपछि प्रधान महासंघको जिल्ला नगर उपाध्यक्ष बने । वरिष्ठ उपाध्यक्षमा चुनाव हारे पनि उनी अहिले जिल्ला, नगरको उपाध्यक्ष भएर महासंघमा आएका हुन् । यो भन्दा अघिल्लो कार्यकाल पनि उनी महासंघको उपाध्यक्ष थिए । वरिष्ठ उपाध्यक्ष निर्वाचित भएको खण्डमा महासंघको नेतृत्व लिदाँ उनले स्वतः अर्को दुई कार्यकाल महासंघमा रहनुपर्ने हुन्छ ।

‘मैंले आफ्नो जीवनका महत्वपूर्ण २८ वर्ष महत्वपूर्णरुपमा महासंघ खटिरहेको भन्दै अब मन्दिर मानेर काम गर्नेछु,' प्रधानले भने । खुलेरै प्रधान प्यानललाई सहयोग गरिरहेका महासंघका भावी अध्यक्ष गोल्छाले उक्त टोलीलाई शुभकामना दिँदै महासंघलाई राजनीतिबाट मुक्त गर्नुपर्ने आवश्यकता आएकोले आफूले प्रधान प्यानललाई सहयोग गरेको उल्लेख गरे । उम्मेदवारी दर्ता गराउने क्रममा वस्तुगत उपाध्यक्षका उम्मेदवार श्रेष्ठले आफ्नो समुहले सबै उद्योगी व्यवसायीलाई एकढिक्का भएर अगाडि बढ्ने बताउँदै कोरोना महामारीपछि अर्थतन्त्र र उद्योग व्यवसायको क्षेत्रमा देखिएको समस्या समाधान गर्न आफ्नोतर्फबाट सक्रिय भूमिका निभाउने प्रतिवद्धता व्यक्त गरेका थिए ।

गत वर्ष चैत महिनामा हुनुपर्ने साधरणसभा कोरोना भाइरस महामारी नियन्त्रणका लागि सरकारले लागू गरेको लकडाउनका कारण सारिएको थियो । त्यसपछि साउनको २६ र २७ गते ललितपुरको हेरिटेज गार्डेनमा साधरणसभा गर्ने तय भएको थियो । महासंघको विधान अनुसार, कुनै विशेष परिस्थितिले साधरणसभा रोकिन गएमा तीन महिनाभित्र अर्को मिति तोकेर साधरणसभा गर्नुपर्छ । महामारी फैलिएपछि विभिन्न जिल्लामा स्थानीय प्रशासनको निशेधाज्ञा लगायतका कारण साधरणसभा पुनः रोकिएपछि महासंघको कार्यकारिणी समितिले बाधा अड्चन फुकाउको अधिकार प्रयोग गर्दै साधरणसभा सारेको हो ।

देशभर सञ्जाल रहेका महासंघको साधरणसभामा देशभरका उद्यमी व्यवसायी, वस्तुगत समूह, द्विराष्ट्रिय उद्योग वाणिज्य संघ तथा कर्पोरेट संस्थाका प्रतिनिधिहरुले मतदान गर्छन् । महासंघको साधरणसभा बारम्बार स्थगित भएपछि भर्चुअल माध्यममार्फत् साधरणसभा सम्पन्न गर्नुपर्ने आवाज समेत उठेको थियो । महासंघले  मंसीर ११ मा साधरणसभाको उद्घाटन भर्चुअल माध्यमबाट र कोभिड-१९ को जोखिमलाई ध्यानमा राख्दै महासंघको सचिवालय टेकू, प्रज्ञा प्रतिष्ठान कमलादी र कार्की ब्यांकेट माइतीघरमा मतदान कार्यक्रम तय गरेको छ ।

महासंघको निर्वाचनमा जिल्ला उद्योग वाणिज्य संघको मतभार ५० प्रतिशत, वस्तुगतको २० प्रतिशत र द्धिराष्ट्रिय उद्योग वाणिज्य संघसहित एसोसिएटको ३० प्रतिशत हुन्छ । प्रधानसँग वरिष्ठ उपाध्यक्षमा महासंघका अर्का उपाध्यक्ष चन्द्रप्रसाद ढकालले प्रतिस्पर्धा गर्दैछन् । ढकालसहित उनको प्यानलबाट जिल्ला नगर उपाध्यक्षमा गुणनिधि तिवारी, वस्तुगत उपाध्यक्षमा उमेशलाल श्रेष्ठ तथा एशोसिएट उपाध्यक्षमा रामचन्द्र संघई प्रतिस्पर्धामा छन् ।