नेपालमा कोभिडबाट मृत्यु हुनेको संख्या हजार नाघ्यो

काठमाडौँः नेपालमा कोभिड १९ संक्रमणबाट मृत्यु हुनेको संख्या हजार नाघेको छ । पछिल्लो २४ घन्टामा २० जना कोभिड संक्रमितको मुत्यु भएसँगै मृतकको संख्या एक हजार नाघेको स्वास्थ्य मन्त्रालयले जनाएको छ ।

सोमबार १४ जना कोभिड संक्रमितको मृत्यु भएको थियो । योसँगै नेपालमा कोरोना संक्रमणबाट मृत्यु हुनेको संख्या एक हजार ४ पुगेको छ । पछिल्लो २४ घण्टामा तीन हजार १ सय १४ जनामा कोभिड–१९ को संक्रमण पुष्टि भएको छ । यो सँगै नेपालमा कोरोना संक्रमितको संख्या एक लाख ७९ हजार ६ सय १४ जना पुगेको स्वास्थ्य तथा जनसंख्या मन्त्रालयले जनाएको छ ।

मन्त्रालयका अनुसार सोमबार देशभर तीन हजार १ सय ४२ जना कोभिड संक्रमणमुक्त भएका छन् । योसँगै हालसम्म एक लाख ४१ हजार १ सय ३४ जना संक्रमणमुक्त भएका छन् । त्यस्तै, हाल आइसोलेसनमा ३७ हजार ४ सय ७६ जना रहेका छन् भने क्वारेन्टाइनमा बसिरहेका संक्रमितको संख्या एक हजार २ सय ७७ जना रहेको मन्त्रालयले जनाएको छ ।