राष्ट्रपतिले वामदेवलाई भनिन् : पार्टी विभाजन हुनबाट राेक्‍न भूमिका खेल्नुस्

काठमाडौं : राष्ट्रपति विद्यादेवी भण्डारीले सत्तारुढ दल नेकपालाई विभाजन हुनबाट रोक्न भूमिका खेल्न नेकपा उपाध्यक्ष वामदेव गौतमलाई आग्रह गरेकी छन् । राष्ट्रपति भण्डरीले उपाध्यक्ष गौतमलाई शतिल निवासमा बोलाएर पार्टीलाई एक राख्‍न भूमिका खेल्न आग्रह गरेकी हुन् । 

मंगलबार साँझ ५ बजेबाट आधा घण्टा भएको छलफलमा राष्ट्रपति भण्डारी र उपाध्यक्ष गौतमबीच नेकपाभित्र पछिल्लो समय देखिएको विवादबारे छलफल भएको गौतमका प्रेस संयोजक विश्‍वमणि सुवेदीले जानकारी दिए । ‘राष्ट्रपतिले पार्टी एक रहने पक्षमा उपाध्यक्षसँग चिन्ता लिनुभयो,’ गौतमलाई उध्रित गर्दै सुवेदीले इकागजसँग भने, ‘विगतमा पनि पार्टीमा विवाद हुँदा मिलाएको र अहिलेपनि मिलाउनका लागि समन्वयकारी भूमिका खेल्न आग्रह गर्नुभयो ।’

जवाफमा गौतमले पार्टीमा एकतासहित विधि, पध्दतीको स्थायीत्वका लागि आफूहरु लागिरहेको बताएका थिए । ‘हामी पार्टी एक राख्‍न र पार्टीमा विधि र पध्दतीको स्थायीत्व निर्माण गर्न लागिरहेका छौं,’ गौतमले राष्ट्रपतिलाई भनेका थिए, ‘अहिलेसम्म पार्टी एक राख्‍न लागिरहेको छु । आगामी दिनमा पनि लाग्छु ।’

भण्डारीले पार्टीलाई फुटबाट जोगाउन सक्रिय भएर लाग्‍न आग्रह गरेको र गौतमले आफू दत्तचित्त भएर लागेको बताएको सुवेदीले जानकारी दिए । 
 
नेकपामा प्रधानमन्त्रीसमेत रहेका अध्यक्ष केपी शर्मा ओली र अर्का अध्यक्ष पुष्पकमल दाहालबीचको विवाद उत्कर्षमा छ । शनिबार दुई अध्यक्षबीच भएको भेटमा ओलीले पार्टी अलग अलग गर्ने प्रस्ताव गरेका थिए । ओलीले पार्टी अलग गर्न भनेको दाहालले खुमलटारमा आइतबार नेताहरूसँग बताएका थिए ।