थोत्रा टायरबाट सजिएको गमला

नेपालगञ्‍ज : धेरैलाई लाग्ला मोटर, गाडीका थोत्रा टायर काम लाग्दैनन् । तर त्यसो होइन रहेछ काम नलाग्ने भनेर फ्याँकिएका टायरलाई बनायो भने निकै राम्रो देखिन्छ । फ्याँकिएका टायरहरु बटुल्दै नेपालगन्जका सुर्य गरुङले त्यहि पुराना टायरबाट गमला बनाई रहेका छन् ।

जुन गमला अहिले स्थानीयहरुका घर, आगनमा सजाउने काममा प्रयोग भइरहेका छन् । नेपालगञ्ज उपमहानगरपालिका-४ सल्यानी बंगालाका ५५ वर्षीय सुर्य गुरुङ गाडीका पुराना टायरबाट गमला बनाउन व्यस्त छन् । उनलाई कोभिड-१९ कहर, लकडाउनले कुनै असर गरेको छैन् ।

सामाजिक सञ्जालमा टायरबाट निर्मित गमलाहरुको तस्बिर देखेर प्रेरित भएका उनले फालिएका टायरबाट मनग्गे पैसा कमाइरहेका छन् । बिना लगानी कबाडीमा पाइने सामग्रीबाट गमला बनेको देखेर आफु सुरुमा आकर्षित भएको उनी बताउँछन् ।

कोभिड-१९ का कारण लामो समय लकडाउन भइरहेका बेला उनले सुरुमा टायरको गमला आफ्नो घरका लागि मात्रै बनाएका थिए । सोही तस्बिर सामाजिक सञ्जाल फेसबुकमा पोष्ट गरेपछि उक्त गमलाको माग भएपछि बल्ल उनले अरुका लागि बनाउन थालेका हुन् ।

एक सय बढि टायरबाट बनाइएका नयाँ प्रकारका गमला बनाई उनले बिक्रि गरिसकेका छन् । फालिएका टायर, फालिएका प्लाष्टिकका बोत्तल, फलामको रड, बालुवा र सिमेन्ट प्रयोग गरेर उनले आकर्षक गमला बनाउने गरेका छन् । गमलाको आयु कम्ती ५० वर्षसम्म रहने उनको भनाई रहेको छ ।  उनी लकडाउनकै समय अवधिमा १ लाख ५० हजार बढि रकम आम्दानी गरिसकेको बताउँछन् ।

आफुले बनाएका गमलाको माग बमोजिम उपलब्ध गराउन नसकेको बताउँछन् । उनको यो नयाँ खालको व्यवसाय फस्टाउँदै गएपछि कर्मचारीहरु बढाएर व्यवसायलाई अघि बढाउने सोचमा उनी छन् ।