के अनमोल र धिरज बक्स अफिसमा भिडलान् ?

काठमाडौं :  नारी दिवसको अवसर पारेर ‘ए मेरो हजुर ४’ले प्रदर्शन मिति सार्वजनिक गरेको छ । नयाँ पोस्टरसँगै सार्वजनिक गरिएको मितिमा फिल्म भदौ १८ गते प्रदर्शन हुने उल्लेख गरिएको छ । तीजको बिदा खाने लक्ष्यसहित फिल्म यो मितिमा आउन लागेको बुझिन्छ ।

झरना थापाले निर्देशन गरेको फिल्ममा अनमोल केसी र निर्देशक थापाकी छोरी सुहाना थापा मुख्य भूमिकामा छन् । तर, सोमबार नै धिरज मगर र जसिता गुरुङको मुख्य भूमिका रहेको ‘आइ एम ट्वान्टी वान’ पनि भदौ १८ मै आउने भनी समाचार सार्वजनिक भएको थियो ।

यसले बक्स अफिसमा अनमोल र धिरज मगरको भिडन्त हुने आशंका बढाएको थियो । तर, ‘आइ एम ट्वान्टी वान’का निर्माता प्रज्वलशमशेर जबराले फिल्मको प्रदर्शन मिति टुंगो लागिनसकेको जानकारी गराए । उनले इकागजसँग कुराकानी गर्दै फिल्म भदौ र असोजको मितिमा प्रदर्शन गर्ने सोच रहे पनि प्रदर्शन मिति ठ्याक्कै टुंगो गरी नसकेको बताए ।

‘हो, हामीले भदौ १८ देखि असोज ३ सम्मको मितिसम्ममा पनि छलफल गरेका हौं तर १८ भन्नै टुंगो गरेका छैनौं । अहिले पोस्ट प्रडक्सनको काम भइरहेको छ । हाम्रो ध्यान यतै छ । केही दिनमा प्रदर्शन मिति सार्वजनिक गर्छौं,’ प्रज्जवलले भने । ‘आइ एम ट्वान्टी वान’को सुटिङ सकेर पोस्ट प्रडक्सनको काम भइरहेको छ । तर, यता ‘ए मेरो हजुर ४’ को  भने अझै २० दिनको सुटिङ बाँकी छ । फिल्मको अन्तिम सेड्युल २५ गतेबाट सुरु गर्ने निर्माण टिमको तयारी छ । 

दुई वर्षअघि अनमोलको ‘ए मेरो हजुर ३’र सलिनमान बानियाँको ‘यात्रा’ एकै मितिमा रिलिज भएका थिए । सोबेला अनमोलको फिल्मले बक्स अफिसमा राम्रो व्यापार गर्दा सलिनको फिल्मले भने कमजोर व्यापार गरेको थियो । बलिउडका ठूला हिन्दी फिल्मले दसैँतिहारका मुख्य बिदामा फिल्म घोषणा गरिसकेपछि नेपाली निर्माताले चित्त बुझ्दो डेट पाउन सकस भइरहेको छ ।

यही कारण भदौ र असोजको दोस्रो हप्तासम्म नेपाली फिल्मबीच रिलिज डेटलाई लिएर मारामार हुने अवस्था छ । ‘ए मेरो हजुर ४’ले पनि हतार गरेर फिनिसिङ नै नगरी पोस्टर रिलिज गर्नमा पनि यही मनोविज्ञानले काम गरेको बुझ्न सकिन्छ । यसो गर्दा अरुभन्दा पनि आफूले पहिले घोषणा गरेको दाबी गर्न सजिलो हुन्छ । तर, ‘आइ एम ट्वान्टी वान’का निर्माताका भनाइको आसय विश्लेषण गर्दा भने तत्कालका लागि अनमोल र धिरजको भिडन्त नहुने देखिन्छ ।