पुलिस मेयर कपको फाइनलमा

काठमाडौँ: नेपाल पुलिस क्लबले काठमाडौँ मेयर कपको फाइनलमा स्थान पक्का गरेको छ । बुधबार काठमाडौँ मेयर-११ लाई एक सय तीन रनले पराजित गरेपछि पुलिसले फाइनल यात्रा तय गरेको हो । 

प्रतियोगितामा तेस्रो जित हासिल गरेसँगै पुलिसले छ अंक बनायो । कुल पाँच टिम सम्मिलत प्रतियोगितामा शसस्त्र प्रहरीको एपीएफ तीन खेलबाट चार अंक रहेको छ । त्यस्तै त्रिभुवन आर्मी क्लब, बागमती प्रदेश र मेयर-११ को समान दुई-दुई अंक छ ।

कीर्तिपुरस्थित त्रिभुवन विश्‍वविद्यालय क्रिकेट मैदानमा भएको खेलमा पुलिसले टस हार्दै पहिले ब्याटिङ गर्‍यो । योगेन्द्र सिंह कार्कीले बनाएको ४० रनको मद्दतले पुलिसले ४७.४ ओभरमा सबै विकेट गुमाउँदै एक सय ९७ रनको योगफल तयार पार्‍यो । मेयर-११ ले जवाफी ब्याटिङमा ३१.२ ओेभरमा ९४ रन बनाएको थियो । पुलिसका लागि ओपनरद्वय सुनिल धमला र कुशल भुर्तेलले ५६ रनको साझेदारी गरे । सुनिलले २२ रन बनाए भने कुशलले ३४ रनको योगदान गरे । त्यस्तै दिपेन्द्र सिंह ऐरीले २४ रन जोडे । 

बलिङतर्फ सन्दिप लामिछाने, विपिन खत्री र हरीशंकर साहले तीन-तीन विकेट हात पारे । त्यस्तै, अनिल खरेलले एक विकेट लिए । 

मेयर-११ का कृष्ण कार्की, कप्तान सन्दिप र सिदान्त लोहनीले क्रमशः १९, २६ र १८ रन बनाए । अन्य ब्याट्सम्यानले भने दोहोरो अंक छुन सकेनन् । पुलिसका लागि पवन सरार्फ र दिपेन्द्रले धारिलो बलिङ गरे । पवनले १६ रन खर्चेर चार विकेट हात पारे भने दिपेन्द्रले १८ रनको क्षतिमा तीन विकेट लिए । त्यसैगरी, ललित राजवंशीले दुई विकेट थपे भने सागर ढकालले एक विकेट थपे ।