प्रियंका र निकले अस्करको मनोनयन सार्वजनिक गर्ने

लसएन्जल्स :  अभिनेत्री प्रियंका चोपडा र गायक निक जोनासले यो संस्करणको अस्कर मनोनयन सार्वजनिक गर्ने भएका छन् । प्रियंका र निकले ‘लाइभ एक्सन’ अन्तर्गतका २३ विधाका फिल्मको मनोनयन सार्वजनिक गर्ने भएका हुन् । दुई भागमा प्रस्तुत गरिने मनोनयन आउँदो सोमबार सार्वजनिक गरिँदैछ । 

अस्करको नयाँ संस्करणमा ‘नमडल्यान्ड’, ‘ट्रायल अफ दि सिकागो’ ‘प्रमिसिङ योङ वुमन’ले धेरै विधामा मनोनयन पाउने अपेक्षा गरिएको छ ।  सदा फ्रेब्रुअरीमा हुँदै आएको अवार्ड यो साल अप्रिलमा हुन लागेको हो ।

कोरोना भाइरसको महामारीका कारण अवार्डको मितिसँगै थिएटरका फिल्मबाहेक ओटीटीमा रिलिज भएका फिल्मलाई पनि प्रतिस्पर्धामा समावेश गराउने नियम ल्याइएको थियो । नत्र हलमा रिलिज नभएका फिल्मले अस्करको प्रतिस्पर्धामा सहभागी हुन नपाउने नियम थियो ।