दैलेखमा माइक्रो दुर्घटना हुँदा एक जनाको मृत्यु

सुर्खेत : दैलेखको रामघाट नजिकै माइक्रो गाडी दुर्घटना हुँदा एक जनाको मृत्यु भएको छ । कालिकोटबाट सुर्खेत आउँदै गरेको ०२४७ नम्बरको माइक्रो गाडी दुर्घटना हुँदा एक जनाको मृत्यु भएको हो । 

दुर्घटनामा कालिकोटको शुभकालिका गाउँपालिकाका ३७ वर्षीय जितेन्द्रराज शाहीको मृत्यु भएको छ । दुर्घटनामा ७ जना घाइते भएका छन् । घाइतेहरूको उद्धार गरी कर्णाली प्रदेश अस्पताल पठाउन लागिएको घटनास्थलमा रहेका प्रहरी हवलदार केशव धामीले जानकारी दिए । 

उक्त गाडीमा १५ जना यात्रु सवार रहेको उनले जानकारी दिए ।  दुर्घटनापछि माइक्रो गाडीका चालक फरार रहेको धामीले बताए । दुर्घटना कसरी भयो भन्ने विषयमा थप विवरण आउन बाँकी रहेको धामीले बताए ।