मुम्बईलाई हराउन असम्भव छैन : धवन

यसपटकको इन्डियन प्रिमियर लिग (आइपीएल) मा दिल्ली क्यापिटल्सको सुरुवात बलियो रह्यो । सुरुवाती प्रर्दशनका आधारमा उसलाई प्रतियोगिताको उपाधी दाबेदारका रुपमा लिइएको थियो । मुम्बई इन्डियन्स बाहेक कुनै टोली बलियो देखिएको थियो भने त्यो दिल्ली नै थियो । तर प्रतियोगिताको उत्तरार्धमा लगातार चार खेलमा पराजित भएपछि दिल्लीले निर्णायक समय आइपुग्‍नै लाग्दा लय गुमाएको हो की भन्‍ने प्रश्‍न उठ्नु जायज थियो । 

यस सिजन मुम्बईले दुई पटक नै दिल्लीलाई पराजित गरेको छ । पछिल्लो खेलमा त झन् मुम्बई नौ विकेटले विजयी बन्यो । लगातार चार खेलमा पराजय भोगे पनि, दिल्लीले कठिन समयमा रोयल च्यालेन्जर्स बेंग्लोरलाई हराउदै प्लेअफमा स्थान बनायो । उता मुम्बईले मगंलबार लिग चरणको आफ्नो अन्तिम खेलमा सनराइर्जस हैदराबादलाई पराजित गर्‍यो ।
 
बिहीबार प्रतियोगिताको पहिलो क्वालिफायर खेल दुबई अन्तराष्ट्रिय रगंशालामा हुदैछ । जहाँ मुम्बई र दिल्ली आमनेसामने हुँदैछन् । पराजित हुने टीमले फाइनल प्रवेशका लागी अर्को मौका पनि पाउनेछ । उसले शुक्रबार हुने दोस्रो क्वालिफायरमा विजय हुने टीमको सामना गर्नेछ । 

प्रतियोगिता नयाँ चरणमा प्रवेश गरिसकेको अवस्थामा दुवै टीमका पछल्ला खेल प्रर्दशनले बिहिबार हुने खेलमा कुनै प्रभाव पार्ने छैन । ‘मुम्बईले प्रतियोगिताको लिग चरणमा राम्रो प्रर्दशन गरेको छ । तर त्यसकै आधारमा उनीहरु हामी भन्दा एक कदम अगाडी छन् भन्ने होइन,’ दिल्लीका ब्याट्सम्यान धवनको भनाई थियो, ‘हाम्रो टीम नराम्रो छैन । तर हामी स्पष्ट योजना सहित मैदानमा उत्रन जरुरी छ । त्यसो गरेमा मुम्बईलाई हराउन असम्भव छैन ।’

आइपीएलमा सर्बाधिक रन बनाउने खेलाडीको सूचीमा धवन तेस्रो स्थानमा छन् । उनले आफ्नो लयलाई कायम राख्न सके भने दिल्लीका लागी जितको बाटो पहिल्याउन सहज हुनेछ । तर ट्रेन्ट बोल्ट र जसप्रित बुमराह मुम्बईको पहिलो एघारमा फर्किने समचार धवनका लागि सुखद भने होइन । ती दुवै खेलाडी मुम्बईको पछिल्लो खेलमा देखिएका थिएनन् । मुम्बईले उनीहरुलाई आराम गर्न दिएको थियो । 

‘ट्रेन्ट र जसप्रितले यो प्रतियोगितामा उत्कृष्ट प्रर्दशन गरिरहेका छन् । उनीहरुले लगातार खेलिरहको भएर आराम दिनु जरुरी थियो । किन की बाँकी दुई खेलका लागि उनीहरुले पुर्णरुपमा ताजा महसुस गर्न जरुरी छ,’ मुम्बईका बलिङ प्रशिक्षक रहेका शेन बोन्डले भने । 

यता मुम्बईका कप्तान रोहित शर्मा मगंलबारको खेलका लागि तयार छन् । उनी दिल्लीको सामना गर्न शारिरिक रुपमा पूर्ण फिट रहेको बताएका छन् । हैदराबादसँगको खेलमा उनी छोटो समयका लागि मैदानमा रहे । त्यस खेलमा उनले पूर्णरुपमा सहज महसुस गरिएको देखिएन । त्यसकारण उनले दिल्लीविरुध्दको खेलमा कसरी प्रस्तुत होलान भन्ने प्रश्‍न उठेको छ । 

रोहित चोटबाट फर्किदै गरेको अवस्थामा कस्तो प्रर्दशन गर्ने हुन भन्ने प्रश्नले ठाउँ पाइरहदा, दिल्लीका कागिसो राबडा र एनरिच नोटेर्जेले मुम्बईविरुध्द उत्कृष्ट प्रर्दशन गर्ने अठोट लिएका छन् । यदि उनीहरुले रोहित र क्‍वान्टन डि कोकलाई राम्रो सुरुवात गर्नबाट रोक्न सके भने मुम्बईको मध्यक्रमलाई दबाब पर्नेछ । 

यता बोन्ड भने आत्मविश्वासी देखिन्छन् । ‘प्रतियोगितामा हामी यस्तो टीम हो जसको विरुध्द कोही पनि खेल्न रुचाउदैनन् । यदी हामीले हाम्रो टीमको स्तर अनुसारको खेल्न सक्यौं भने हामी जोसुकैलाई पनि हराउछौ,’ बोन्डले दाबी गरे ।