हेटौँडामा स्थानीय तह सहिद स्मृति गोल्डकप सुरु

 हेटौंडा : बागमती प्रदेशको राजधानी हेटौंडामा स्थानीय तह सहिद स्मृति गोल्डकप अन्तराष्ट्रिय फुटबल प्रतियोगिता सुरु भएको छ । बिहीबार खेलको राष्ट्रिय कलाकार तथा धुर्मुश-सुन्तली फाउन्डेशनका अध्यक्ष सिताराम कट्टेलले उद्घाटन गरेका हुन् । उनले खेल क्षेत्रलाई विकास गर्न अन्तराष्ट्रिय स्तरको बहुउपयोगि गौतम बुद्ध अन्तराष्ट्रिय क्रिकेट रंगशाला यही बैशाखबाट सुरु गर्नेगरी काम भइरहेको जानकारी दिए ।

प्रतियोगिताको उद्घाटन खेलमा रिगल हेटौंडा रिसोर्ट मकवानपुर-११ ले विजयी सुरुवात गरेको छ । सिमराको नव जनजागृती युवा क्लबलाई ४-१ गोलअन्तरले हराउँदै मकवानपुर-११ विजयी बनेको हो । खेलको म्यान अफ दी म्याच मकवानपुर-११ का विमल राना घोषित भए । उनले २ गोल गरेका थिए ।

यस्तै मकवानपुर ११ का रञ्जन विष्ट र अमिर श्रेष्ठले एक एक गोल गरे । सिमराका मोहित गुरुङले खेलमा १ गोल फर्काएपनि खेल जित्न सकेन् । हारसँगै नव जनजागृती युवा क्लब सिमरा प्रतियोगिताबाट बाहिरिएको छ ।

अब शुक्रबार दिउँसो २ बजे नेपाली आर्मि क्लब र जावलाखेल युथ क्लब काठमाडौंबिच खेल हुनेछ । प्रतियोगिताको विजेताले नगद १० लाख, उपविजेताले नगद ५ लाख रुपैयाँ तथा सर्वोत्कृष्ट खेलाडीले ३५० सिसीको बुलेट बाइक प्राप्त गर्नेछन् । हेटौंडा स्कूल अफ म्यानेजमेन्टले सर्वोत्कृष्ट खेलाडीको लागि बुलेट बाइकको प्रायोजन गरेको हो ।