पेरिसडाँडाबाट छुट्टीएर माधव नेपाल बानेश्वरको अर्याल होटलमा बास बस्नुभएको भन्ने सुनेको छुः ओली

काठमाडौँः प्रधानमन्त्री केपी शर्मा ओलीले माधव नेपाल समूहमाथि व्यंग गरेका छन् । अखिल नेपाल महिला संघको कार्यकर्ता भेलामा ओलीले बाटो बिराएका नेताहरूलाई सच्चिएर आउन आग्रह गरेका छन् । 

उनले माधव नेपाल समूहले ‘केपी ओलीलाई ठेगान लाउन आउँछौं’ भनेको सुनेको भन्दै आफूले त्यो कुरा ‘खुट्टा देख्दै पत्याएको’ र त्यसो गरे ‘बाटैमा खुट्टामा ठेस लाग्ने’ बताए । उनले समय छँदै मेहनत, पसिना, बल, बुद्धि खर्च गर्न आग्रह गरे । 

माधव नेपाल पेरिसडाँडा (माओवादीको पार्टी कार्यालय) बाट बानेश्वरको अर्याल होटलसम्म आएर बास बस्नुभएको छ रे भन्ने सुनेको छु । उहाँलाई बालुवाटारसम्म आइपुग्न पर्याप्त समय पुगोस् भनेर चैत ७ गते बालुवाटारमा केन्द्रीय समिति बैठक बोलाएको छु ।

निरन्तर अनुपस्थित हुनुभयो भने विधान बमोजिम हुनेछ ।

‘आउनुभएन निरन्तर अनुपस्थित हुनुभयो भने विधान बमोजिम हुनेछ,’ उनले भने, ‘आउनुभयो भने त्यसपछि छलफल गरेर अघि बढौंला ।’ 

उनले आफूले कसैको पद नखोसेको र पार्टी सञ्चालन गर्दै गर्नका लागि अन्तरिम व्यवस्था गरेको बताए । 

‘मैंले अरूले जस्तो उहाँहरूको पद खोसेको छैन,’ ओलीले भने, ‘उहाँहरू कता–कता हुनुहुन्छ । पार्टी त सञ्चालन गर्दै गर्नुपर्‍यो नि !’

सर्वोच्च अदालतले गत साता नेपाल कम्युनिष्ट पार्टी (ने क पा) पार्टीको नाम अर्को दलसँग मिलेको एकीकरण प्रक्रियामा नै प्रश्न गर्दै पुनः एकीकरण प्रक्रिया शुरु गर्न वा दुई कम्युनिष्ट पार्टी पुरानै दलका रूपमा रहन सक्ने फैसला सुनाएको थियो । 

उक्त फैसलापछि माधव नेपाल समूहले एकीकृत नेपाल कम्युनिष्ट पार्टी (ने क पा) को अन्तिम स्थायी समिति बैठक भन्दै पेरिस डाँडाबाट बाहिरिएर एमालेमै रहेर ओलीको अधिनायकवाद विरुद्ध संघर्ष गर्ने भन्दै एमालेमै फर्कने निर्णय गरेका थिए । 

तर ओलीले शुक्रबार नेपाल समूहका नेताहरूलाई जिम्मेवारीविहीन बनाएर पूर्व माओवादीबाट आएका रामबहादुर थापा, लेखराज भट्ट लगायत र आफू निकटका सुवास नेम्वाङ लगायतका नेताहरूलाई प्रदेश इन्चार्जको जिम्मेवारी दिएका छन् । उनले वरिष्ठ नेता माधव कुमार नेपालको विदेश विभाग प्रमुखको पद खोसेर आफ्ना सल्लाहकार राजन भट्टराईलाई नियुक्त गरेका छन् । 

त्यसलगत्तै नेपाल समूहले आज ओलीको ‘तानाशाही प्रवृत्ति विरुद्ध संघर्ष गर्ने’ भन्दै एमालेभित्र समानान्तर कमिटीहरू घोषणा गरेको छ ।