झापामा छुट्टाछुट्टै दुर्घटनामा दुईको मृत्यु

झापा : झापामा शनिबार भएका छुट्टाछुट्टै सडक दुर्घटनामा परी दुई जनाको मृत्यु भएको छ । मृत्यु हुनेमा शिवसतासी नगरपालिका-४ का २७ वर्षीय सरोज कार्की र  बाह्रदशी गाउँपालिका-५ की ४३ वर्षीया कलसावती राजवंशी रहेको जिल्ला प्रहरी कार्यालय झापाले जनाएको छ । 

अपराह्न कमल गाउँपालिका-१  बालुबारीस्थित क्याम्पमा ना १ त ६१६५ नम्बरको टिपरले विपरीत दिशाबाट आउँदै गरेको मे ३ प ३७४७ नम्बरको मोटरसाइकललाई ठक्कर दिँदा मोटरसाइकल चालक कार्कीको घटनास्थलमै मृत्यु भएको थियो ।

त्यस्तै बाह्रदशी गाउँपालिका-५ कनकन मार्गमा मे ११ प ८४५१ नम्बरको स्कुटी आफैँ अनियन्त्रित भई दुर्घटना हुँदा स्कुटी चालक राजवंशी घाइते भएकी थिइन् । उनको उपचारका क्रममा विर्तामोडस्थित विएण्डसी अस्पतालमा मृत्यु भएको प्रहरीले जनाएको छ ।

जिल्ला प्रहरी कार्यालयका प्रवक्ता राकेश थापाले दुर्घटना न्यूनीकरणका लागि सचेतनामूलक कार्यक्रम भइरहे पनि दैनिक सवारी दुर्घटनामा पछिल्लो समय मृत्यु हुनेको सङ्ख्या बढिरहेको बताए । (रासस)