प्रिमियर लिगः एक वर्षपछि गोल गरेका अग्वेरो म्यानचेस्टर सिटीमै रहलान् ?

काठमाडौँ: प्रिमियर लिगमा शनिबार म्यानचेस्टर सिटीले फुलहमलाई ३-० ले हराउँदा सर्जियो अग्वेरोले एक गोल गरे । अग्वेरोले ६० औँ मिनेटमा पेनाल्टी गोल गरे । अर्जेन्टिनियन फरवार्डले लिगमा गोल नगरेको एक वर्षभन्दा बढी भइसकेको थियो ।

चोटबाट निरन्तर पिडित भइरहेका खग्वेरोले गत सिजन झन्डै आधा सिजन घुँडाको चोटका कारण मैदान बाहिर रहे । यस सिजन उसतै प्रकृतीको चोट र कोभिड-१९ ले अग्वेरोले १४ खेल गुमाएका छन् । तर शनिबार राती फुलहमसँगको खेलमा गोल गरेसँगै अग्वेरोले राहत महसुस गरे । 

सिटीलाई इंग्लिस फुटबलको पावरहाउस बनाउन महत्वपूर्ण भूमिका खेलेका अग्वेरो पछिल्ला महिनाहरुमा पेप ग्वार्डिओलाको टिममा मुख्य स्ट्राइकर बन्‍न सकेका छैन । सिटीले लिग जित्दा सधैँ प्रमुख गोलकर्ता बन्ने गरेका अग्वेरो यस पटक भने छायाँमा परेका छन् । उनको उल्लेख्य भूमिका बिना नै सिटी लिग उपाधिको नजिक पुगेको छ भने च्याम्पियन्स लिग र घरेलु कपमा पनि सिटीको सम्भावना बलियो छ ।   

सिटीसँगको सम्झौता यसै सिजनको अन्त्यमा सकिँदै गरेका अग्वेरो अर्को सिजन कुन क्लबमा हुनेछन्, टुङ्गो छैन । उनी बार्सिलोनासँग पनि जोडिएका छन् । तर अग्वेरोले भविष्यका बारेमा केही निर्णय गरिनसकेको बताउँदै आएका छन् । 

अक्टोबर यता पहिलो पटक लिगमा सिटीको पहिलो एघारमा परेका अग्वेरोले फुलहमसँगको खेलमा उही पुरानो लय देखाए । ३२ वर्षिय स्ट्राइकर पुरै ९० मिनेट मैदानमा रहे । अनि सिटीका अर्का स्ट्राइकर गाब्रियल जेजससँग पनि उनको साझेदारी उत्साहप्रद देखियो ।