माओवादी केन्द्रको बैठक : रामबहादुर थापासहितका नेतालाई कारबाही गर्नेबारे छलफल

फाइल तस्बिर

काठमाडौँ :  सर्वाेच्चको आदेशपछि ब्युँतिएको माओवादी केन्द्रको पहिलो केन्द्रीय कमिटी बैठकमा एमालेको बागमती प्रदेश इन्चार्ज बनेका रामबहादुर थापासहितका नेतालाई कारबाही गर्ने विषय छलफल भएको छ । माओवादी केन्द्रको आइतबार सुरु भएको बैठकमा पार्टीको अनुशासन उल्लंघन गरेको भन्दै उनीहरूलाई कारबाहीको तयारी गरेको हो ।

माओवादी केन्द्रले सरकारमा रहेका थापासहितका सांसदहरुलाई फिर्ता हुन निर्देशन दिइसकेको छ । एमालेको केन्द्रीय समितिमा मनोनित भएका नेताहरुलाई दल परित्याग गरेको हो वा होइन त्यसबारे जवाफ पठाउन माओवादी केन्द्रले शनिबार आग्रह गरेको थियो ।  

शनिबारको स्थायी कमिटी बैठकले गृहमन्त्री रामबहादुर थापा, उद्योगमन्त्री लेखराज भट्ट, खानेपानीमन्त्री मणिचन्द्र थापा, सिंचाइमन्त्री प्रभु साह, श्रममन्त्री गौरीशंकर चौधरी र खेलकुद मन्त्री दावा लामालाई २४ घण्टे लिखित स्पष्टिकरण सोधेको थियो  ।