सुनको गहना चोरी गर्ने २ जना पक्राउ

हेटौंडा : सुनको गहना चोरी गरेको अभियोगमा प्रहरीले २ जनालाई पक्राउ गरेको छ ।  गहना चोरी गरेको अभियोगमा प्रहरीले मकवानपुरको बकैया गाउँपालिका-२ बस्‍ने २० वर्षीय गणेश बहादुर स्याङ्तान र बकैया गाउँपालिका-३ बस्‍ने १९ वर्षीय दिपेश बिकलाई आइतबार पक्राउ गरेर आज मंगलबार सार्वजनिक गरेको हाे ।

गत माघ २३ गते साँझ ६ बजे समय बकैया गाउँपालिका-३, हात्तीसुँडेस्थित न्यु सुनचाँदी पसलबाट सुनका गहना र नगद चोरी भएको भनी प्रहरीमा उजुरी दर्ता भएपछि प्रहरीले अनुसन्धान सुरु गरेको थियो । प्रहरीले २० लालको सुनको माईली तिलहरीसहित स्याङ्तान र बिकलाई पक्राउ गरेको हो । 

पक्राउ परेका दुवैजनाविरुद्ध थप अनुसन्धानका लागि जिल्ला अदालतबाट म्याद थप गरेर प्रहरी हिरासतमा राखिएको जिल्ला प्रहरी कार्यालय मकवानपुरका प्रहरी प्रवक्ता प्रहरी नायब उपरीक्षक जयश्वर रिमालले जानकारी दिए ।